Qashqadaryoda “Cobalt” haydovchisi voyaga yetmagan piyodani urib yuborib, voqea joyidan qochib ketgan. Bu haqda viloyat IIB xabar berdi.

Qayd etilishicha, 2022-yil 5-dekabr kuni viloyat IIBga kelib tushgan xabarga ko‘ra, shu kuni taxminan soat 20:00 atrofida Qarshi shahar, “Nasaf” ko‘chasida piyodalar yo‘lagidan kesib o‘tayotgan Qarshi shahrida yashovchi, voyaga yetmagan X.D.ni “Cobalt” rusumli, oq rangli, davlat raqam belgisisiz avtomashina urib yuborgan. Haydovchi esa hayoti va sog‘lig‘i xavf ostiga qolgan voyaga yetmagan jabrlanuvchiga yordam ko‘rsatmasdan hodisa sodir bo‘lgan joydan yashiringan. Natijada, X.D. tan jarohatlari bilan, shifoxonaning jonlantirish bo‘limiga yotqizilgan.

Mazkur holat yuzasidan Qarshi shahar Ichki ishlar organlari faoliyatini muvofiqlashtirish boshqarmasi huzuridagi tergov bo‘limi tomonidan O‘zbekiston Respublikasi Jinoyat kodeksining 266-moddasi 1-qismi va 117-moddasi 1-qismi bilan jinoyat ishi qo‘zg‘atilgan. Holat yuzasidan viloyat miqyosida avtomashinani qidirib topish bo‘yicha ishlar tashkillashtirilgan.

“Hurmatli fuqarolar, agarda sizda yuqoridagi YTH bilan bog‘liq ma’lumot bo‘lsa, ichki ishlar organlarining 102 qisqa telefon raqamiga yoki yaqin oradagi ichki ishlar bo‘limlariga xabar berishlaringiz so‘raladi. Ma’lumot bergan fuqaroning shaxsi sir saqlanishi kafolatlanadi”, – deyiladi xabarda.

• Avtohalokat
• Qashqadaryo