Qozog‘istonning asosiy elektr tarmoqlari operatori bo‘lgan KEGOC kompaniyasi 25-yanvardagi elektr energiyasi bilan bog‘liq muammolarga izoh berdi. Unga ko‘ra, kuzatilgan blekaut maynerlar faoliyati bilan bog‘liq emas.

“O‘zbekistonda 25-yanvar kuni Nur-Sulton vaqti bilan soat 11:59da Sirdaryo IESda 6 ta energoblok qisqa tutashuv tufayli o‘chib qoldi. Natijada umumiy ishlab chiqarish quvvati 1500 megavattdan ortiq yo‘qotilgan.

O‘zbekiston energetika tizimida yuzaga kelgan elektr quvvati taqchilligi O‘zbekiston va Qirg‘iziston energetika tizimlari bilan parallel ishlashga ulangan Qozog‘iston energetika tizimidan ruxsatsiz elektr energiyasini olib qo‘yishga olib keldi.

Natijada, 500 kilovoltlik “Shimoliy–Sharqiy–Janubiy Qozog‘iston” tranziti uchun elektr quvvati ko‘tarilib, uning ortiqcha yuklanishi kuzatildi”, – deyiladi KEGOC munosabatida.

KEGOC ma’lumotlariga ko‘ra, taqchillikning asosiy omillari elektr stansiyalarida avariyalarning yuqoriligi va elektr energiyasi iste’molining sezilarli o‘sishi bo‘lib, o‘tgan yil davomida bu ko‘rsatkich 6 foizdan oshgan, bu so‘nggi yillarga nisbatan 3 barobarga ko‘p.

Elektr energiyasi taqchilligi sharoitida KEGOC elektr stansiyalari va energiya ta’minoti tashkilotlari bilan birgalikda mayning bilan shug‘ullanuvchi data-markazlariga rejalashtirilgan elektr energiyasini yetkazib berishni qisqartirish choralarini ko‘rgan.

Eslatib o‘tamiz, bir muddat oldin ayrim ekspertlar ommaviy elektr o‘chishini Qozog‘istonda faoliyat ko‘rsatayotgan maynerlar faoliyati bilan bog‘liq bo‘lishi mumkinligini aytib chiqqan edi.

• Elektr energiyasi
• Energetika_vazirligi
• IES
• Qozog‘iston