Avvalroq, Namanganda 152 ta qoidabuzarlik oqibatida 410 mln soʻm jarima qayd etgan avtomobil aniqlangani haqida xabar berilgandi.

Taniqli huquqshunos Xushnudbek Xudoyberdiyev ushbu holatga o‘z munosabatini bildirib, tizim yaxshi yo‘lga qo‘yilmaganini tanqid qildi.

“Bunaqalar “yo’l terroristlari” deyiladi, shunaqa kaltafahmlarning dastidan har yili minglab insonlar halok bo’lmoqda, qancha oila ota-ona yoki farzand dog’ida kuymoqda. Lekin bunaqalar baribir yo’qolib ketmaydi. Yana yangilari chiqaveradi. Chunki tizim shunga yo’l qo’yib beradi”,– deb yozadi u.

Shuningdek, huquqshunos yuzdan oshiq huquqbuzarliklar sodir qilgan avtomobil egasi shu paytgacha qidiruvga berilmaganini katta xatoligini ta’kidlagan.

“Mana, masalan, shu videoda aytilishicha, 01 T 234 ZA soxta raqamiga 152 ta qoidabuzarlik qayd etilgan bo’lsa-da, lekin bu raqam bazada bo’lmagani uchun jarima qo’llash haqida qaror chiqarishning imkoniyati bo’lmabdi emish. Nima??? Tushunmadim, shu paytgacha 152 marta soxta raqam radarlarga tushgan bo’lsa, lekin u bazada bo’lmasa, nega uni tezda tekshirmadinglar? Nega ko’chalarda soxta raqamli bitta mashina tezlikni 152 marta oshirgani qayd etilgan bo’lsa-da, uni bartaraf etish chorasini ko’rmadinglar. Nega qidiruvga berilmadi? Nega yo’llar to’silmadi? Bu nima ahmoqgarchilik? Bu qanaqa xavfsizlik? Shumi sizlarning aqlli va zamonaviy tiziminglar? Shumi sizlarning “xavfsiz shahar” konsepsiyanglar?”,– deb yozadi Xudoyberdiyev.

Xushnudbekning yozishicha, tizim yaxshi yo’lga qo’yilmas ekan, ertaga haqiqiy terrorist ham bunday ishlarni qilishdan tap tortmasligi mumkin.

“Raqam bazada yo’qligi uchun jarima yozolmayapmiz, deb ikki qo’linglarni burninglarga tiqib yuraverasizlarmi shunaqa? Ertaga birorta haqiqiy terrorist mashinasiga soxta raqam taqib, aholi uchun shuncha katta real xavf tug’dirib yursa ham birorta organ buni aniqlolmasdan yuraverasizlarmi shunaqa? Bilmadim, nima deyishga ham hayronman. Bunaqa buzuq tizim mavjud ekan, yo’llarimiz tartibga kelishini kutish noto’g’ri”,– deb xulosa qilgan huquqshunos Xushnudbek Xudoyberdiyev.

• Namangan
• Qoidabuzarlik