“Rossiyada ota-ona qaramog‘isiz qolgan yana 16 nafar bola O‘zbekistonga qaytarildi”, – deb xabar bermoqda Ijtimoiy himoya milliy agentligi.

Xabarga ko‘ra, bugun, 5-aprel kuni tongda Rossiya Federatsiyasining Sankt Peterburg shahridan O‘zbekistonning 16 nafar voyaga yetmagan fuqarosi O‘zbekiston Ichki ishlar va Sog‘liqni saqlash vazirligi xodimlari hamrohligida vatanga qaytarilgan.

Bunda Sankt Peterburg va Moskvadagi O‘zbekiston konsullik idoralari bolalarni davlat fuqarosi sifatida identifikatsiya qilish va ularga qaytish sertifikatlarini rasmiylashtirish bo‘yicha barcha choralarni ko‘rgan. Hozirda bolalar vaqtincha Toshkent shahar IIBB qoshidagi Voyaga yetmaganlarga ijtimoiy-huquqiy yordam ko‘rsatish markaziga joylashtirilgan.

Markazda ularni ota-onalari va yaqin qarindoshlari “Inson” ijtimoiy xizmatlar markazlari tomonidan oldindan tayyorlangan vasiylik hujjatlari bilan kutib olishdi. Voyaga yetmaganlarga ijtimoiy yordam ularning keyingi yashash joylarida ham davom ettiriladi.

Olib kelingan 16 nafar bolalarning 11 nafari ota-onalariga, qolganlari esa vasiylik asosida qarindoshlariga topshirilgan.

• O‘zbekiston
• Rossiya
• fuqaro