5-aprel kuni Samarqand iqlim forumi doirasida “Markaziy Osiyoda iqlim o‘zgarishi sharoitida suv resurslarini integratsiyalashgan holda boshqarish” mavzusidagi panel sessiyasi bo‘lib o‘tadi.

Muhokamada O‘zbekiston Respublikasi Suv xo‘jaligi vaziri Shavkat Hamroyev, Tojikiston Respublikasi energetika va suv xo‘jaligi vazirining birinchi o‘rinbosari Jamshid Shoimzoda, Qozog‘iston Respublikasi suv xo‘jaligi va irrigatsiya vaziri Nurjan Nurjigitov, Turkmaniston suv xo‘jaligi davlat qo‘mitasi raisi Durdi Gendjiev, Qirg‘iz Respublikasi suv resurslari, qishloq xo‘jaligi va qayta ishlash sanoati vaziri Baxit Toroboyev, BMT Bosh kotibining Markaziy Osiyo bo‘yicha maxsus vakili, BMTning Markaziy Osiyoda nizolarning oldini olish bo‘yicha mintaqaviy markazi rahbari Kaxa Imnadze, GIZ mintaqaviy dastur direktori Karolin Milov ishtirok etadi.

Uchrashuvdan ko‘zlangan maqsad mintaqaviy hamkorlikni mustahkamlash, suvni tejaydigan texnologiyalarni joriy etish, infratuzilmani modernizatsiya qilish, iqlim o‘zgarishiga moslashish, moliyalashtirish, global kun tartibiga integratsiyalashuv va boshqa dolzarb masalalarni muhokama qilishdan iborat.

Ma’lumot uchun, Markaziy Osiyoning ijtimoiy-iqtisodiy va ekologik barqarorligi suv resurslarini oqilona boshqarishga bog‘liq. Transchegaraviy daryolar tizimi (Amudaryo, Sirdaryo) negizida joylashgan mintaqa iqlim muammolariga duch kelmoqda: muzliklarning erishi, beqaror yog‘ingarchilik, haroratning oshishi. Bu omillar Sobiq ittifoq davridan meros bo‘lib qolgan suv taqsimotidagi tarixiy qarama-qarshiliklarni va qishloq xo‘jaligi, energetika va ekotizimlar o‘rtasidagi raqobatni kuchaytiradi. Orol dengizining halokatli qurishi suvdan noratsional foydalanish oqibatlarini eslatib turadi.

Yalpi majlis davomida ishtirokchilar kelajak avlodlar uchun suv xavfsizligini ta’minlashda iqlim moslashuvi bilan mintaqaviy hamkorlikni uyg‘unlashtirgan suv resurslarini kompleks boshqarish strategiyalarini muhokama qiladilar.

• Samarqand
• sammit
• sessiya