14 март куни Россиянинг "Биринчи канал"идаги жонли эфир вақтида телеканал муҳаррири "Урушни тўхтатинг" жумласи ёзилган плакат билан залга кириб келди. У телебошловчи Екатерина Андрееванинг орқа томонига туриб олган ва плакатни бир неча сония давомида ушлаб турган. Плакатга "NO WAR. Урушни тўхтатинг. Тарғиботга ишонманг. Бу ерда сизга ёлғон гапиришяпти" деб ёзилган.

Жонли эфирдаги норозилик акциясидан аввал журналист Марина Овсянникова видеомурожаат ёзиб қолдирган ва унда Украинадаги урушни кескин қоралаган.

"Ҳозирда Украинада бўлаётган ишлар – жиноят. Россия – тажовузкор мамлакат. Ушбу жиноятнинг жавобгарлиги фақат битта одамнинг виждонига ҳавола бўлади. Бу одам Владимир Путин.

Менинг отам украин, онам эса рус. Улар ҳеч қачон душман бўлишмаган. Бўйнимдаги ушбу тақинчоқ Россиянинг биродаркушлик урушини дарҳол тўхтатиши кераклиги тимсолидир, бизнинг биродар халқларимизда ярашиб олиш имконияти ҳали ҳам бор.

Афсуски, охирги йиллар ичида Биринчи каналда ишладим, Кремль тарғиботи билан шуғулландим, бунинг учун жуда уятлиман. Телевизор экранидан туриб ёлғон гапиришга йўл қўйганим учун уятдаман. Россиялик одамларни зомбига айлантиришга имкон берганим учун уятдаман.

Биз буларнинг барчаси бошланган 2014 йилда сукут сақладик. Кремль Навальнийни заҳарлаганида митингларга чиқмадик. Инсониятга қарши бўлган ушбу режимни жим кузатиб турдик. Бугун эса дунё бизлардан юз ўгирди. Зурриётларимизнинг яна ўнлаб авлоди биродаркушлик урушининг бундай шармандалигидан қутула олишмайди.

Биз, рус халқи – фикр юритувчи ва ақлли одамлармиз, ушбу телбаликни тўхтатиш фақат бизнинг қўлимиздан келади. Митингларга чиқинг, ҳеч нарсадан қўрқманг, улар сизларнинг барчангизни қамаб қўя олишмайди", дейилади журналистнинг видеомурожаатида.

Марина Овсянникова норозилик акциясидан зудлик билан қўлга олинган ва дўстларининг айтишича, айни вақтда Останкино Ички ишлар бўлимида сақланмоқда.

• Rossiya
• Ukraina