Respublika shoshilinch tibbiy yordam ilmiy markazi Samarqand viloyati filialiga 29 yoshli fuqaro qorin sohasidagi kuchli og‘riq bilan murojaat qilgan. Markaz axborot xizmatining xabariga ko‘ra, uning oshqozonidan 200 grammga yaqin mix va “samorez” topilgan.

Shoshilinch qabul bo‘limida o‘tkazilgan diagnostika va laboratoriya tekshiruvlari davomida bemorning oshqozon-ichak tizimida ko‘p miqdorda metall jismlar, jumladan, mix va “samorez” borligi aniqlangan.

Shifokorlar bemorga zudlik bilan jarrohlik amaliyoti o‘tkazish zarurligini belgilagan. Markazning oliy toifali shifokori Yo‘ldosh Quliyevning ma’lum qilishicha, barcha tayyorgarlik jarayonlaridan so‘ng laparotomiya va gastrostomiya usulida operatsiya amalga oshirilgan.

Amaliyot davomida bemorning qorin bo‘shlig‘idan qariyb 200 grammga yaqin metall jismlar olib tashlangan. Jarrohlik bir soatga yaqin vaqt davom etgan. Hozirda bemorning ahvoli qoniqarli, u mustaqil harakatlana olmoqda.

Ma’lum qilinishicha, erkak kuchli stress holatiga tushib, o‘z xatti-harakatlarini nazorat qila olmagan va ushbu metall buyumlarni yutib yuborgan.

• Samarqand
• fuqaro
• shifoxona
• stress