Ijtimoiy tarmoqlarda Qumqo‘rg‘on tumani hududidan oqib o‘tuvchi suv havzasi rangining keskin o‘zgargani aks etgan videolar tarqaldi. Holat yuzasidan Surxondaryo viloyati Ekologiya va iqlim o‘zgarishi bosh boshqarmasi rasmiy izoh berdi.

23-aprel kuni Boysun tumanida kuzatilgan kuchli yog‘ingarchilik oqibatida yuzaga kelgan sel oqimlari neft saqlanadigan sun’iy omborlarga zarar yetkazgan bo‘lishi mumkin. Oqim Kofurun soydan boshlanib, Bandixon tumani orqali Qumqo‘rg‘on tumanigacha yetib kelgan.

Sel davomida tog‘ jinslari, tabiiy cho‘kindilar va turli aralashmalar suv tarkibiga qo‘shilib, uning tashqi ko‘rinishida keskin o‘zgarishlar yuzaga kelgan.

Shu bilan birga, O‘zbekiston Suv xo‘jaligi vazirligi hodisaning aniq sabablarini ochiqladi. Unga ko‘ra, Xangaronsoy sohilida olib borilgan burg‘ulash ishlari jarayonida chiqarilgan neft vaqtinchalik tuproq dambalarida saqlangan. Ushbu inshootlar Eriell Group tomonidan barpo etilgan.

Kuchli yog‘ingarchilik sabab suv sathi keskin oshib, dambalardan sel suvlari oshib o‘tgan. Natijada neft aralashgan suvlar avval Bandixonsoyga, so‘ng Surxondaryo daryosiga qo‘shilgan.

Hodisadan so‘ng Eriell Group tomonidan dambalar qayta tiklangani va neft oqishi to‘liq bartaraf etilgani ma’lum qilindi.