Rossiya mudofaa vaziri Sergey Shoyguning fikricha, Shanxay hamkorlik tashkilotining (ShHT) yangi kuch markazi sifatidagi roli notinch xalqaro vaziyat fonida ortib bormoqda. Bu haqda u bugun, 24-avgust kuni Toshkentdagi ShHTga a’zo davlatlar Mudofaa vazirlari yig‘ilishida aytdi.

 “Bunday sharoitda ShHTning roli yangi kuch markazi, teng huquqlilik va oʻzaro hurmatga asoslangan davlatlararo munosabatlar modeli, xalqaro huquq normalariga rioya qilish kafolati sifatida izchil oshib bormoqda. Shuning uchun, harbiy sohadagi hamkorlikni mustahkamlash, umumiy xavfsizlik masalalari bo‘yicha ikki va ko‘p tomonlama formatlarda muntazam maslahatlashuvlar olib borish muhim”. Bunday yondashuvlar joriy uchrashuvda imzolash uchun tayyorlangan yakuniy hujjatlarda mustahkamlangan”,— deydi Rossiya mudofaa vaziri.

Uning so‘zlariga ko‘ra, “bugungi uchrashuv nihoyatda beqaror xalqaro vaziyat fonida o‘tmoqda”.

“Shanxay hamkorlik tashkiloti mintaqasida, butun dunyoda boʻlgani kabi, tahdidlar kuchaymoqda, mahalliy inqirozlar susaymayapti, yangi jiddiy chaqiriqlar paydo boʻlmoqda”, “Amerika Qo‘shma Shtatlari va kollektiv G‘arb global hukmronlikni saqlab qolish uchun mustaqil davlatlarga misli ko‘rilmagan bosim o‘tkazmoqda. Buning uchun ochiq shantaj, tahdidlar, rangli inqiloblar va davlat to‘ntarishidan foydalaniladi”. “G‘arbning qarama-qarshi harakatlari va u joriy etayotgan sanksiyalari natijasida jahon iqtisodiyotidagi vaziyat yomonlashmoqda, aloqalar buzilmoqda, sun’iy ravishda oziq-ovqat inqirozi yaratilmoqda”, — deydi Sergey Shoygu.

Ma’lumot uchun, bugungi kunda ShHTga sakkiz davlat aʼzo : Oʻzbekiston, Qozogʻiston, Rossiya, Hindiston, Xitoy, Pokiston , Qirgʻiziston va Tojikiston.

• Sergey Shoygu
• ShHT