Endigina uyqudan uygʻongan boʻlsangiz ham tetiklikni his qilmaysizmi? Bu holatning sababi siz oʻylagandan koʻra anchayin jiddiy. Surunkali holsizlikni yuzaga keltiruvchi asosiy sabablar haqida bilasizmi?

Kamqonlik

Qondagi temir moddasi yetarli miqdorda boʻlmasa, dam olish ham, toʻlaqonli uyqu ham tanaga tetiklik bagʻishlay olmaydi. Shifokorlar bu holatga barham berish uchun qon tahlillarini topshirish, gemoglabin miqdorini tekshirishni tavsiya etishadi. Kamqonlikka qarshi kurashishga yordam beradigan vitaminlar qabul qilish ham zarar qilmaydi.

Boshdan kechirilgan infeksion kasallik

Bu holatni tushunish qiyin emas: organizm kasallik bilan kurashish natijasida qattiq toliqadi. Bunday holatda surunkali horgʻinlikni yuzaga keladi. Mutaxassislar kasallikdan endigina tuzalgan odamlarga organizmning qayta tiklanib olishi uchun vaqt berishni, badantarbiya bilan shugʻullanishni tavsiya etishadi. Har kuni 10-15 daqiqadan toza havoda sayr qilish ham vaziyatni yaxshi tomonga oʻzgartira oladi.

Notoʻgʻri ovqatlanish

Shirinliklarni yaxshi koʻrasiz, taomnomaga unchalik ham jiddiy eʼtibor qaratmaysiz, meva hamda sabzavotlardan koʻra fast-fudni afzal bilasizmi? Bu holatda nima uchun surunkali charchoq hissidan qutula olmayotganingizni tushuntirib berishimiz shart emas. Vaziyatni oʻnglash uchun zudlik bilan zararli mahsulotlardan parhez boshlashingiz, vitamin hamda foydali minerallarga boy boʻlgan mahsulotlarni koʻproq isteʼmol qilishingiz kerak. Dengiz mahsulotlari, jigar, goʻsht, meva hamda sabzavotlar ana shular sirasiga kiradi.

Ruhiy charchoq

Bunday holatda muammoning yechimini shifokor bilan emas, ruhshunos koʻmagida topishingiz kerak. Ruhiy charchoq odatda kasbiy faoliyati tezlikni, odamlar bilan doimiy muloqotda boʻlishni talab qiladigan mutaxassislarda uchraydi. Dam olmasdan tinimsiz ishlash ham koʻp hollarda ruhiy charchoqni keltirib chiqaradi. Kuniga 8 soat uhlasangiz ham kun boʻyi oʻzingizni horgʻin his qilsangiz, ishdan 2 haftalik taʼtil oling: muammoni ildizi bilan yoʻq qilmasangiz, bu borada yengil-yelpi usullar sizga yordam bera olmaydi.

Qondagi qand miqdori bilan bogʻliq muammolar

Qondagi qand miqdorining oshib yoki tushib ketishi ham doimiy holsizlik hissiga sabab boʻlishi mumkin. Bunday holatda shifokor tavsiyasiga koʻra ish tutish, kerakli tahlillarni topshirish tavsiya etiladi. Muammoga qarshi kurashni oʻz vaqtida boshlash yoqimsiz oqibatlarning oldini olishga yordam beradi.

• Foydali
• salomatlik