Tbilisida norozilik namoyishlari paytida 44 kishi jarohat olgan. Bu haqda Gruziya Sog‘liqni saqlash vazirligi ma’lum qildi.

Qayd etilishicha, Tbilisidagi norozilik namoyishlarida 44 kishi, shu jumladan 27 aksiya ishtirokchisi, bitta jurnalist va ichki ishlar vazirligining 16 xodimi jarohat olgan.

Namoyishchilarni tarqatish uchun politsiya suv qurollari, ko‘zdan yosh oqizuvchi gaz va tutun bombalaridan foydalangan, bunga javoban namoyishchilar huquqni muhofaza qilish organlariga otashinlar otishgan.

Uch kecha davomida namoyishlarda 200 kishi hibsga olingan.

Tbilisidagi norozilik namoyishlari bugun, to‘rtinchi kun davom etmoqda. Ular Bosh vazir Irakliy Kobaxidzening Gruziyaning Yevropa Ittifoqiga a’zo bo‘lishi to‘g‘risidagi muzokaralarni 2028-yil oxirigacha to‘xtatib turish to‘g‘risidagi bayonotidan so‘ng boshlangan.

• Gruziya
• Namoyish