“Ukraina bilan urush Rossiyaga Pskov yoki Janubiy Saxalin aholisi soniga teng “nogironlar armiyasi”ni berdi”, – deb yozadi The Moscow Times.

Rossiya federal statistika xizmatining Yagona idoralararo axborot-statistika tizimida e’lon qilingan Rossiya Ijtimoiy jamg‘armasi ma’lumotlariga ko‘ra, 2023–2024-yillarda mamlakatda nogironlarning umumiy soni 190 mingga ko‘paygan.

O‘tgan yilning oxiriga kelib, mamlakatda nogironlar soni 11 mln 122 mingga yetgan, bu ko‘rsatkich 2023-yilda 11,04 mln va 2022-yilda 10 mln 932 mingga teng bo‘lgan. Axborot-statistika tizimi ma’lumotlariga ko‘ra, nogironlar sonining o‘sish sur’ati 2007-yildan beri eng yuqori ko‘rsatkichni qayd etgan.

Xalqaro strategik tadqiqotlar institutining (IISS) ma’lum qilishicha, 2024-yilning oxiriga kelib, 376 ming rossiyalik frontda og‘ir yaralangan va nogiron bo‘lib qolgan. IISS hisob-kitoblariga ko‘ra, Rossiya armiyasining 2022–2024-yillardagi umumiy yo‘qotishlari taxminan 783 ming kishini tashkil etgan. Ulardan kamida 172 ming nafari halok bo‘lgan, 611 ming kishi yaralangan. Yaradorlarning qariyb 235 ming nafari tuzalib ketgan, qolganlari esa butun umrga nogiron bo‘lib qolgan.

• Rossiya
• Ukraina
• Urush