Saudiya Arabistoni va Birlashgan Arab Amirliklari Pokiston fuqarolariga nisbatan migratsiya nazoratini keskin kuchaytirdi. Rasmiy ma’lumotlarga ko‘ra, 2025-yilning o‘zida Saudiya Arabistoni tilanchilikda gumon qilingan taxminan 24 ming nafar Pokiston fuqarosini deportatsiya qilgan. Vakolatli idoralar bu choralarni uyushgan tilanchilik va jinoyatchilikka qarshi kurash doirasida izohlagan.

Pokiston Federal tergov agentligi bosh direktori ma’lum qilishicha, so‘nggi yillarda chet ellarda pokistonliklarga bog‘liq uyushgan tilanchilik va jinoyat tarmoqlari sezilarli darajada ko‘paygan. Uning ta’kidlashicha, bu holat mamlakatning xalqaro imijiga jiddiy zarar yetkazmoqda.

Ma’lumotlarga ko‘ra, Dubay ma’muriyati ham shunga o‘xshash sabablar bilan 6 ming nafarga yaqin Pokiston fuqarosini BAAdan chiqarib yuborgan. Ozarbayjonda esa taxminan 2,5 ming nafar pokistonlik tilanchi deportatsiya qilingani rasman tasdiqlangan. Mutasaddilar bunday holatlar Afrika va Yevropa davlatlarida ham kuzatilayotganini qayd etmoqda.

Shuningdek, Kambodja va Tailand kabi davlatlarga berilgan turistik vizalarning suiiste’mol qilinishi ham xavotir uyg‘otgan. Ayrim guruhlar turli viza turlaridan foydalanib, tilanchilik va boshqa noqonuniy faoliyat bilan shug‘ullanmoqda.

Muammo 2024-yilda Saudiya Arabistoni tomonidan berilgan qat’iy ogohlantirishlar ortidan yanada ochiq ko‘rinish olgan. Ar-Riyod ma’muriyati Umra vizalari orqali kelgan ayrim Pokiston fuqarolarining tilanchilikka aralashganini bildirib, Islomoboddan qat’iy choralar ko‘rishni talab qilgan.

Pokiston hukumati esa ushbu holatlarni bartaraf etish uchun ichki tekshiruvlar va nazorat mexanizmlarini kuchaytirishga va’da bermoqda.

• Deportatsiya
• Pokiston
• Saudiya Arabistoni