BMTning Jahon oziq-ovqat dasturi (JOD) Afg‘onistonda to‘yib ovqatlanmaslikdan aziyat chekayotgan millionlab aholiga yetarli darajada yordam ko‘rsata olmayotganini ma’lum qildi.

Qayd etilishicha, “Tolibon” hokimiyatni qayta qo‘lga olganidan so‘ng Afg‘onistonga yo‘naltirilayotgan xalqaro yordam hajmi sezilarli darajada qisqargan. Bundan tashqari, zilzilalar kabi bir qator tabiiy ofatlar mavjud vaziyatni yanada og‘irlashtirgan.

BMT ma’lumotlariga ko‘ra, eng zaif qatlamga mansub 6 million nafar afg‘onistonlikni oziq-ovqat bilan ta’minlash uchun 460 million dollardan ortiq mablag‘ zarur. Hozirda 17 million kishi ochlikdan aziyat chekmoqda. Bu ko‘rsatkich o‘tgan yilga nisbatan qariyb 3 million nafarga oshgan.

Shuningdek, 3,7 million afg‘on bolasi yetarli ovqatlanmayapti, ularning 1 million nafari og‘ir ahvolda ekani qayd etilgan.

• Afg‘oniston
• BMT
• Ochlik