AQSh prezidenti Donald Trampning maxsus elchisi Stiv Uitkoff va Oq uy rahbarining kuyovi Jared Kushner G‘azo sektorini qayta tiklash bo‘yicha 112 milliard dollarlik taklif ishlab chiqdi. Bu haqda The Wall Street Journal xabar bermoqda.

Ta’kidlanishicha, Project Sunrise “vayron qilingan anklavni go‘zal metropolisga” aylantirishga qaratilgan. Amerika tomonining hisob-kitoblariga ko‘ra, buning uchun 10 yil va 112,1 milliard dollar talab etiladi.

“Rejada G‘azoni tiklashni qaysi davlatlar va kompaniyalar moliyalashtirishi, shuningdek, qayta qurish paytida 2 million falastinlik qayerda yashashi haqida aniq ma’lumot berilmagan”, – deb yozadi nashr.

​Vashington ushbu loyihaning asosiy ishtirokchisi bo‘lishga, “grantlar ko‘rinishida 60 milliard dollar ajratishni qo‘llab-quvvatlashga va barcha ishlarni amalga oshirish uchun qarzlarning kafili bo‘lishga” tayyor ekanligi aytilmoqda. 10 yildan so‘ng G‘azo sektori tiklanish bo‘yicha keyingi qadamlarni mustaqil ravishda moliyalashtirishi va pirovardida kreditlarni to‘lashni boshlashi rejalashtirilgan.

“Taklif bilan “potensial homiylar, jumladan Fors ko‘rfazining boy qirolliklari, Turkiya va Misr” allaqachon tanishtirilgan”, – deb aytdi gazetaga ismi oshkor etilmagan AQSh amaldori.

​Uitkoff, Kushner va yana bir necha amaldorlar so‘nggi 45 kun davomida reja ustida ishlagan va Isroil, xususiy sektor vakillari hamda pudratchilar bilan maslahatlashgan. Nashrga ko‘ra, AQSh ma’muriyatidagi ayrim shaxslar bu loyihaga shubha bilan qaragan va Falastinning XAMAS radikal guruhining qurollarini topshirishga tayyorligiga ham, Vashingtonning boshqa mamlakatlarni “urushdan keyingi xavfli hududni yuqori texnologiyali shahar maydoniga aylantirish"ga sarmoya kiritishga ishontirish imkoniyatiga ham ishonch bildirmagan.

• AQSh
• Falastin
• Loyiha