37°
Kechasi 24°
Joriy yil 14-may kuni Tog‘li Badaxshon avtonom viloyati aholisi viloyat rahbari Alisher Mirzonabot va Xorug‘ hokimi Rizo Nazarzodaning isteʼfosini talab qilib norozilik bildirirgan, shuningdek, ular Xorug‘dagi barcha nazorat-o‘tkazish punktlarini olib tashlash va Badaxshon aholisiga nisbatan taʼqiblarni to‘xtatishni talab qilishgan edi.
16-may kuni esa Tojikistonning Tog‘li Badaxshon aholisi Xorug‘ shahri markazida mitingga to‘planmoqchi bo‘lgan va ularga huquq-tartibot idoralari to‘sqinlik qilishi ortidan ikki tomon orasida to‘qnashuv kelib chiqqan edi.
Bunga javoban hukumat mazkur hududda aksilterror operatsiyasi o‘tkazilishini eʼlon qildi. Tojikiston IIVning maʼlumotlariga ko‘ra, 200 nafar qurolli jinoyatchilar guruhi Rushon viloyati markazidagi Dushanbe-Xorog‘ avtomagistrali va chegara komendaturasini to‘sib qo‘ygan.
Bir nafar harbiy xizmatchi halok bo‘lgan, 13 nafari esa og‘ir tan jarohatlari olgan. Mahalliy aholidan esa 20 nafarga yaqini to‘qnashuvlarda halok bo‘lgani aytilmoqda.
“Agar Tojikiston hukumati Tog‘li Badaxshon avtonom viloyatidagi vaziyatni tashqi terrorchi kuchlar beqarorlashtiryapti, degan faktni asoslab berolsa, KXShT harbiy kuchlaridan yordam olishi mumkin. Yaʼni, qo‘shni davlat hududidagi vaziyatni hal qilish uchun Kollektiv hamkorlik shartnomasi tashkiloti o‘zining harbiy kuchlarini kiritishi mumkin”, – deydi xavfsizlik masalalari bo‘yicha ekspert, Qirg‘iziston Milliy xavfsizlik qo‘mitasi raisining sobiq o‘rinbosari Artur Medetbekov.
Uning so‘zlariga ko‘ra, Qozog‘istondagi vaziyat tashkilot aʼzolari uchun misol bo‘la oladi.
“Tog‘li Badaxshon avtonom viloyatidan so‘nggi bir necha kun davomida ommaviy norozilik namoyishlari haqida xabarlar kelmoqda. Shuning uchun Tojikistonda Emomali Rahmon rejimini saqlab qolish uchun KXShT qo‘llanilishi mumkin. Asosiy masala: ular rostdan ham terrorchilarmi yoki hokimiyatini saqlab qolish uchun o‘z xalqini shunday atashayaptimi? Shunga qaramasdan, tinch aholi orasida Afg‘onistondagi terrorist va ekstremistlar bilan aloqada bo‘lgan narkoguruhlar bo‘lishi mumkin”,– deydi Artur Medetbekov.
Biroq, xavfsizlik bo‘yicha ekspertning qo‘shimcha qilishicha, agar ijtimoiy keskinlik saqlanib tursa, vaziyat birlamchi hal qilinganidan keyin ham kelajakda takrorlanishi mumkin.
Eslatib o‘tamiz, Tojikiston IIV uyushgan jinoiy guruhlar “barcha turdagi qurollarni qo‘llagan holda” Rushon tumani markazida uch nuqtada Dushanbe-Xorug‘ avtomagistrali va chegara komendaturasigacha bo‘lgan yo‘lni to‘sib qo‘ygani, “jinoiy guruhlar avvaldan bu harakatlarni amalga oshirishga tayyorgarlik ko‘rgan va xuddi shu maqsadda xorijdan qurol-yarog‘ va o‘q-dorilar olib kelgan”i haqida maʼlumot bergan edi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
