31°
Kechasi 18°
Giyohvandlikka qarshi kurashish borasida Davlat xavfsizlik xizmati tomonidan boshqa huquq-tartibot idoralari bilan hamkorlikda samarali ishlar olib borilmoqda.
Jumladan, Samarqand viloyatining Urgut tumanida yashovchi, 1998-yilda tug‘ilgan shaxs belgilangan tartibni buzib, aylanma yo‘llar orqali Tojikiston Respublikasidan 8 kg 860 gr “opiy” moddasini kontrabanda yo‘li bilan O‘zbekiston hududiga olib o‘tgan vaqtida, “o‘zbek-tojik” davlat chegarasini qo‘riqlayotgan DXX Chegara qo‘shinlari harbiy xizmatchilarining to‘xtash haqidagi qonuniy talabiga bo‘ysunmasdan, giyohvandlik vositasini tashlab, noma’lum tomonga qochadi. Biroq, u ko‘rilgan tezkor chora-tadbirlar natijasida qo‘lga olingan.
Tergovga qadar tekshiruv davomida, Urgut tumanida yashovchi, 1966-yilda tug‘ilgan shaxs uning jinoiy sherigi ekanligi aniqlanib, protsessual tartibda ushlangan. Bu haqda DXX matbuot xizmati xabar berdi.
Surxondaryo viloyatida qayd etilgan holatda esa, Denov tumanida yashovchi, 1969-yilda tug‘ilgan, muqaddam giyohvandlik vositalari savdosi bilan bog‘liq jinoyati uchun sudlangan shaxs Davlat xavfsizlik xizmati va Ichki ishlar organlari xodimlari tomonidan tekshirilganda, uning yonida 31 gr “opiy” moddasi borligi ma’lum bo‘lgan.
Shundan so‘ng, u ajal og‘usini Denov tumanida istiqomat qiluvchi, 1978-yilda tug‘ilgan fuqarodan sotib olganligi aniqlanib, mazkur narkosavdogarning yashash xonadonidan ham 1 kg 483 gr “opiy” moddasi ashyoviy dalil sifatida olingan.
Xorazm viloyatida kuzatilgan holatda, Gurlan tumanida yashovchi, 1952-yilda tug‘ilgan muqaddam giyohvandlik vositalari savdosi bilan bog‘liq jinoyati uchun ikki marotaba sudlangan shaxs 877 gr “gashish” moddasini xaridorga 14 ming AQSh dollariga sotgan vaqtida qo‘lga olingan.
Aniqlanishicha, ushbu giyohvandlik vositasi tojikistonlik narkokuryerlar tomonidan O‘zbekistonga aylanma yo‘llar orqali olib kelingan.
Hozirda mazkur shaxslarning barchasiga nisbatan Jinoyat Kodeksining tegishli moddalari bilan jinoyat ishlari qo‘zg‘atilib, “qamoq” ehtiyot chorasi qo‘llanilgan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
