Tojikistonda yaqin vaqtlar ichida 600 ta aholi punkti va boshqa geografik obyektlar qayta nomlanadi. Bu haqda “Asia Plus” xabar berdi.
Qayd etish bo‘yicha, ayni paytda hukumatning qayta nomlash bo‘yicha 7 ta qarori ko‘rib chiqish bosqichida turibdi. Ushbu hujjatlarga ko‘ra, Xatlon viloyatining 25 ta, So‘g‘d viloyatining 4 ta tumanidagi bir qator geografik obyektlar, shuningdek, Fayzobod, Varzob va Rudakiy tumanidagi bir nechta aholi punktlari qayta nomlanadi.

“Ularning nomlari zamonaviy talablarga javob bermaydi”, – deya ta’kidladi qo‘mita raisi Sharifjon Jumazoda. Uning so‘zlariga ko‘ra, maxsus ishchi guruh, tasdiqlatish uchun yangi nomlar taklif qilishdan avval mahalliy aholining fikrini inobatga oladi. Qo‘mita mutaxassislaridan biri aytishicha, aynan aholining qayta nomlash qaroriga qarshi chiqib norozi bo‘lishi natijasida qaror qabul qilish kechikmoqda.

Shuningdek, Jumazoda aholi punktlari va boshqa geografik obyektlarni qayta nomlash bo‘yicha tashabbusning deyarli hammasi aholining o‘zidan chiqayotganini ta’kidladi.

O‘tgan yili Tojikiston hukumati qariyb 3,5 mingta geografik obyektlarning qayta nomlanishini tasdiqlagandi. Ular orasida Pomirdagi eng yirik muzlik – Fedchenko ham bo‘lib, u Vanjax deb qayta nomlangandi.

• Obyekt
• Qaror
• Tojikiston