Taniqli jurnalist Shoxira Hamro kecha bo‘lib o‘tgan Toshkent kinofestivalining turk ijodkorlariga bag‘ishlangan qismda chet ellik kinoijodkorlar bilan ro‘y bergan ziddiyatli hodisa yuzasidan ijtimoiy tarmoqlarda post qoldirdi.
“Ooo, hozirgina hayotiy saboqning eng kattasi ro‘y berdi. Yana qayerda deng? Turk kinosi kunlari o‘tayotgan Forumlar saroyi sahnasida! Yuzlab o‘zbek muxlislari ko‘z o‘ngida! Bizning “yulduzlar”ning ham ba’zilari zalda edi, zora ular uchun ham saboq bo‘lsa. Hozir bir boshidan gapirib beraman.Xullas, birinchi suratda ko‘rib turganingizdek, Turkiyadan tashrif buyurgan 9 ta aktyor sahnaga chiqib, hurmat saqlab tomoshabin bilan yuzma-yuz bo‘lishdi. Lekin o‘zbek “burakshunoslari” va Yashilchoy muxlislari tadbirni yarmini ularni kutib, ko‘chada o‘tkazishganiga qaramasdan va sahnada boshlovchilar ikki qayta tantana bilan e’lon qilishsada, bu ikkisi chiqmadi. Va nihoyat Nurgul Yashilchoy sahnani bir burchagidan chiqib, o‘sha yerda qotdi. Hamyurt hamkasblariga bir qur nazar tashladiyu, ikki qo‘lini ikki cho‘ntagiga solib, g‘oz turib oldi. Uzatilgan mikrofonni ham qo‘liga olishni ep ko‘rmay, boshlovchining qo‘lidagi mikrofonga egilib, salom, yaxshimisizlar”-dediyu, boshqa aktyorlar yoniga borib o‘tirmasdan, sahna ortiga o‘tib ketdi. Oybek Veysal o‘g‘li to‘qqizta aktyor bilan birma-bir samimiy suhbat qildilar, lekin Yashilchoy qaytmadi. Burakku umuman ko‘rinmadi. Ko‘nglimning bir chekkasidan “u shunchalik mashhurmikan, to‘qqizta hamkasbini mensimadiya”-degan fikr yilt etib o‘tdi. Bunday o‘ylagan bir men emas ekanligim keyinroq ma’lum bo‘ldi. Sahnadagilarni sovg‘a-salomlar bilan o‘rinlariga kuzatib qo‘yishgachgina Nurgul sahnaga chiqib keldi va uning boshiga boshlovchining boshidagi tojini kiydirib, endi shou boshlanayotgan edi, 58 yildan beri kino san’atiga halol xizmat qilib, sochi oqargan , o‘zining ta’biricha “podshodan qulgacha”barcha rollarni o‘ynagan Sardor Gyokxan sahnaga otilib chiqdiyu, mikrofonni olib “tomoshamizni buzdi deb mendan xafa bo‘lmanglar. Ming afsus, mana bu oyog‘i yerdan uzilgan ikki hamkasbimiz sahnada biz bilan birga o‘tirishdan or qildi, aslida ular bizning safimizda bo‘lishga noloyiq. Siz odamning qiyofasiga qarab baho bermang, uning kimligini hatti-harakatlari bildirib turadi. Biz ortiq bu ikkisining axmoqona tomoshasini ko‘rib, haqoratni jimgina yutib keta olmaymiz. Biz bu yerni hoziroq tark etamiz”-dediyu, to‘qqiz turk ijodkor zalni tark etdi. Ularning ortidan elchixona vakillari ham chiqib ketishdi va shu bilan bugungi tadbirning fayzini ham olib ketishdi. Yashilchoy ham ortiq zalda qola olmadi”.
Keyinchalik Turkiya madaniyat va turizm vaziri o‘rinbosari ushbu voqea uchun o‘zbek tashkilotchilaridan va tomoshabinlardan uzr so‘ragan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!