Ichki ishlar vazirligi Tezkor-qidiruv departamenti va DXX hamkorligida aholi orasida qurol, o‘q-dorilar va portlovchi moddalarni noqonuniy aylanmasining oldini olish yuzasidan targ‘ibot tadbirlari o‘tkazilmoqda.

Tadbirlar natijasida Toshkent shahrida yashovchi fuqaro o‘z ixtiyori bilan 1 dona qo‘l granatasi, kalibrli “TOZ-8” rusumli o‘q otar qurol, 1 dona portlatish qurilmasi va 1 ming 646 dona qurol o‘qlarini topshirdi.

Joriy yilning 2-dekabr kuni 1987-yilda tug‘ilgan fuqaro Toshkent shahar IIBBning 102 raqamiga qo‘ng‘iroq qilib, uyini ta’mirlash vaqtida yerto‘ladan qurol va o‘q-dorilar topganini hamda o‘z ixtiyori bilan topshirishini ma’lum qilgan.

Kelib tushgan murojaat yuzasidan, tezkor tadbir xodimlari tomonidan ushbu fuqaroning yashash xonadoni ko‘zdan kechirilgan.  

Ushbu uyning yerto‘lasidan 1 dona RGD-5 qo‘l granatasi, 1 dona kalibrli “TOZ-8” rusumli o‘q o‘tar qurol, 1 dona o‘q otar qurol, 1 dona portlatish qurilmasi, 5 dona qo‘l granat zapali, 1 dona elektro detanator hamda uning portlovchi shnuri, 546 dona turli xildagi jangovar o‘q-dorilar hamda 1,1 ming dona kalibrli pnevmatik qurol o‘qlari, shuningdek o‘tkir tig‘li jismlar borligi aniqlanib, tegishli tartibda hujjatlashtirib olindi.

Olib borilgan tezkor surishtiruv ishlari davomida, mazkur qurol, o‘q-dorilar va portlovchi moddalar uning marhum otasiga tegishli ekani ma’lum bo‘ldi.  

Otasi Mudofaa vazirligining turli bo‘linmalarida faoliyat yuritib, Mudofaa vazirligi huzuridagi Qurolli Kuchlar Akademiyasidan nafaqaga chiqqani haqidagi ma’lumotlar olindi.

Eslatib o‘tamiz, amaldagi qonunchilik talablariga rioya etgan holda ov qurollari, o‘q-dorilar, turli xildagi o‘qotar qurollari hamda portlovchi moddalar, qilich kabi o‘tkir tig‘li jismlarni belgilangan tartibda ichki ishlar organlariga ixtiyoriy ravishda topshirgan shaxslarga nisbatan hech qanday ma’muriy yoki jinoiy javobgarlik qo‘llanilmaydi.

Ushbu vositalarni noqonuniy saqlash, olib yurish yoki ixtiyoriy topshirmaslik holatlari aniqlangan taqdirda, Jinoyat kodeksining 248-moddasida ko‘rsatilgan bazaviy hisoblash miqdorining 50 baravarigacha miqdorda jarima yoki 2 yildan 5-yilgacha ozodlikdan mahrum qilish bilan jazolanadi.

• DXX
• IIV
• Toshkent