28-sentyabr kuni “Konyaspor” o‘z maydonida “Bashakshehir”ni qabul qilib, muhim g‘alabaga erishdi. Uchrashuv Konyadagi “Katta Shahar” stadionida bo‘lib o‘tdi.

O‘yin 16-daqiqada Alassane Ndao tomonidan urilgan gol bilan boshlandi — 1:0. Bo‘lim yakunida “Bashakshehir” futbolchisi Jerom Opoku avtogol muallifi bo‘lib, mezbonlar hisobni 2:0 ko‘rinishiga keltirdi.

Ikkinchi bo‘limda esa “Bashakshehir” hisobni qisqartirishga muvaffaq bo‘ldi. 57-daqiqada O‘zbekiston terma jamoasi hujumchisi Eldor Shomurodov raqib darvozasini ishg‘ol qilib, hisobni 2:1 ga yetkazdi. U to‘liq 90 daqiqa harakat qildi va o‘yinda eng faol futbolchilardan biri bo‘ldi.

Shundan so‘ng har ikki jamoa bir qancha hujumlar uyushtirdi, ammo hisob o‘zgarmadi. “Konyaspor” 3 ochkoni qo‘lga kiritib, umumiy ochkolarini 10 taga yetkazdi va turnir jadvalida 7-pog‘onaga ko‘tarildi. “Bashakshehir” esa 6 ochko bilan 12-o‘rinda bormoqda.

Shuningdek, yana bir o‘zbekistonlik futbolchi Abbosbek Fayzullayev 64-daqiqada Yusuf Sari o‘rniga zaxiradan o‘yinga qo‘shildi.

• Abbosbek Fayzullayev
• Eldor Shomurodov
• Futbol