Isroil bosh vaziri Benyamin Netanyaxuning BMT Bosh Assambleyasidagi chiqishi ko‘plab davlat vakillari tomonidan salbiy qabul qilindi. Ynet nashri nutq boshlanishidan avval zalni ommaviy tark etgan yoki umuman qatnashmagan davlatlarni sanab chiqdi.

Nashrning Isroil rasmiylariga tayanib xabar berishicha, 77 ta delegatsiya zalni nutq boshlanishidan oldin tark etgan yoki umuman qatnashmagan. Ushbu delegatsiyalar ichida O‘zbekiston ham bor.

Misr, Iordaniya, Livan va Suriya, Saudiya Arabistoni, Turkiya va Eron kabi Isroilga mintaqadosh davlatlar ham Netanyaxu nutqini boykot qilgan. Ammo Bahrayn va BAA vakillari, G‘azodagi voqealar sabab munosabatlar taranglashgan bo‘lsa-da, o‘z o‘rinlarini tark etmagan va Netanyaxuni tinglashgan. Isroil rasmiylari buni har ikki davlat Tel-Aviv bilan rasman diplomatik munosabatlarga egaligi bilan izohlagan.

Netanyaxu minbarga chiqqan vaqti bo‘shab qolgan zal suratlari xalqaro darajada muhokamalarga sabab bo‘ldi. Eron oliy rahbari Ali Xomanaiy ushbu holatga to‘xtalib, Isroilni “eng nafratlanilgan va eng yakkalangan rejim” deb atadi.

“Kecha o‘sha qotil Netanyaxu BMT minbarida turib, bo‘sh o‘rinlarga qarab nutq so‘zladi. Zulm ostidagilarning dod-faryodi erta yo kech sizni quvib yetadi”, – degan Rajab Toyyib Erdo‘g‘an.

Netanyaxu so‘zga chiqqan vaqti zalni tark etgan yoki umuman qatnashmagan 77 davlat orasida Ispaniya, Braziliya, JAR, Irlandiya, Malayziya, Indoneziya, Janubiy Koreya, Quvayt, Qatar, Ummon, shuningdek Lotin Amerikasi, Afrika hamda Tinch okeani mintaqasidagi bir qator mamlakatlar ham bor.

• BMT
• Binyamin Netanyaxu
• Isroil