Xorazmda Transport boshqarmasi bosh mutaxassisi 80 ming AQSh dollari bilan qo‘lga olindi. U ko‘p qavatli turar-joy qurishi uchun tegishli hujjatlarni rasmiylashtirib berishini aytib, “mehnati evaziga” pul talab qilgan.

Ta’kidlanishicha, u tadbirkorlik faoliyati bilan shug‘ullanuvchi fuqaroning ishonchiga kirib, boshqa bir fuqaroga tegishli bo‘lgan va Urganch shahrida aholiga transport xizmatlari ko‘rsatishga ixtisoslashgan MCHJga qarashli 960 metr kvadrat bo‘sh yer maydonini kadastr idoralaridagi tanishlari orqali uning nomiga o‘tkazib, u yerda ko‘p qavatli turar-joy qurishi uchun tegishli hujjatlarni rasmiylashtirib berish evaziga 135 ming AQSh dollari talab qilgan.

Shundan so‘ng, ushbu mutaxassis 80 ming AQSh dollarini oldindan olgan vaqtida huquqni muhofaza qiluvchi organlar tomonidan ashyoviy dalillar bilan ushlangan.

Hozirda mazkur shaxsga nisbatan Jinoyat Kodeksining 168-moddasi 4-qismi “a” bandi va 28,211-moddasining 3-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.

• Xorazm