Turkiyaning Mug‘la viloyatida vertolyot shifoxona binosi ustiga qulab tushdi. Bu haqda “Cumhuriyet” xabar berdi.

Antaliyaga borish uchun havoga ko‘tarilgan tez yordam vertolyoti uchishni boshlagandan so‘ng zich tuman sabab kasalxona binosiga qulab tushgan. Aniqlanishicha, vertolyot bortida ikki uchuvchi va ikki tibbiyot xodimi bo‘lgan.

Hodisa joyiga yetib kelgan Mug‘la viloyati gubernatori Idris Akbiyikning so‘zlariga ko‘ra, vertolyot binoning to‘rtinchi qavatigacha uchib borib, keyin yerga qulagan.

“Vafot etganlarning yaqin birodarlariga hamdardlik bildiraman. Hodisaning batafsil ma’lumotlari o‘rganib chiqiladi”, degan gubernator. Binoning ichida yoki yerda hech kim jabrlanmagan.

Hozirda ushbu hodisa sabablari noma’lum. Voqea sodir bo‘lgan joyni kuchli tuman qoplagani ta’kidlangan.

• Turkiya
• Vertolyot