Turkmanistonning Lebap viloyatida politsiya noqonuniy savdoni bartaraf etish niyatida uyida non yopib sotayotganlarni jarimaga tortmoqda. 

Garabekevul shahridagi koronovirus tufayli ishini yo‘qotgan odamlar o‘z uyida non va non mahsulotlari tayyorlash bilan shug‘ullanmoqdalar. Hozirda viloyatda un yetishmovchiligi mavjud bo‘lib, davlat do‘konlari kunda bir marta non sotishni tashkil etgan. Uzundan -uzun navbatdagilar o‘z oilalari uchun bir juft yopgan non olishlari mumkin.

Viloyat politsiyasi vakillari formasiz xususiy binolar oldida navbatchilik uyushtirmoqdalar, bironta uydan odamlar tinimsiz yelim paket ko‘tarib chiqaversa, demak o‘sha uyda non sotiladi. Birinchi marta qo‘lga tushgan fuqarolar 4500 manat (taxminan 14 million so‘m) miqdorida jarima bilan qutiladilar. Agar holat ikkinchi marta takrorlansa, 15 "sutka", doimiy takrorlansa, jinoyat ishi ochilib nonvoy 6 oydan 12 oyga qamalishi mumkin.

Politsiyachilarni asosan mahalliy ishlab chiqarilgan un mahsuloti topilishi qiziqtiradi. Agar qidiruv davomida bir necha qop un topilgudek bo‘lsa, politsiya ishni o‘g‘irlik deb hujjatlashtiradi.

Viloyatda un yetishmovchiligi mavjud. Xususiy do‘konlarda nonning narxi 3–5 manatdan 8–10 manat (taxminan 24–30 ming so‘m) ga ko‘tarilgan. Mahalliy ishlab chiqarilgan unni sotish qat’iy ta’qiqlanadi. Qozog‘istonda ishlab chiqarilgan eng arzon un 600–620 manat (1 mln 900 so‘m atrofida) ga sotilmoqda.

• Turkmaniston