Bosh prokuratura huzuridagi Departamentning hududiy boʻlimlari tomonidan tergovga qadar tekshiruvlar oʻtkazildi.

Unga koʻra, Kattaqoʻrgʻonda “N.A.” MChJ rahbari N.M. va boshqalar “Mikrokreditbank” ATB Kattaqoʻrgʻon filialidan korxonaga parrandachilikni rivojlantirish uchun ajratilgan 900 mln. soʻm imtiyozli kredit mablagʻini soxta hujjatlarni rasmiylashtirish orqali boshqa maqsadlarda sarflab talon-taroj qilganliklari aniqlangan.

Shuningdek, Xivada fuqaro M.R. 245 mln. soʻm kredit evaziga xarid qilingan “Malibu-2” rusumli avtotransport vositasini garovga qoʻymasdan boshqa shaxsga sotib yuborib, ushbu mablagʻlarni shaxsiy ehtiyojlari uchun ishlatib yuborganligi oydinlashgan.

Bundan tashqari, Chiroqchida “V.g.” MChJ rahbari B. R. (muqaddam firibgarlik va boshqa jinoyatlari uchun sudlangan) va boshqalar taʼminotchi korxona sifatida 5 nafar fuqaroga chorva mollarini yetkazib bermasdan, bank filialidan ajratilgan 150 mln. soʻm imtiyozli kredit mablagʻini naqdlashtirib olib, talon-taroj qilganliklari aniqlangan.

Maʼlum qilinishicha, mazkur holatlar yuzasidan Jinoyat kodeksining 167-moddasi (oʻzlashtirish yoki rastrata yoʻli bilan talon-taroj qilish), 168-moddasi (firibgarlik) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishlari qoʻzgʻatilib, tergov harakatlari oʻtkazilmoqda.

• Departament
• Kredit
• Talon-taroj
• pul