Ukrainaning O‘zbekistondagi elchixonasi joriy yil 1-mart kuni O‘zbekiston Tashqi ishlar vazirligiga Rossiya telekanallari efirini taqiqlashni so‘rab nota yuborgan. Bu haqda “Ozodlik” radiosining Ukraina Elchisi Mikola Doroshenko bilan qilgan intervyusida maʼlum qilindi.

Jurnalistning O‘zbekiston TIVga jo‘natilgan nota mazmuni haqidagi savoliga Mikola Doroshenko elchixona rostan ham nota yo‘llaganini aytib, bu qanday holatlar bilan bog‘liq ekaniga to‘xtalgan.

“Bugun Ukraina Yevropa ikkinchi Jahon urushi davridan beri ko‘rmagan agressiyaga duch kelganini ko‘rib turibsiz va Yevropa bu agressiyaning darajasini anglamoqda.

Ukraina Rossiya harbiy mashinasining arsenali zarbalariga o‘zini tutib, nafaqat o‘zining, balki butun qitʼaning xavfsizligini himoya qilmoqda. Biz nega nota yubordik? Biz Putin (RF prezidenti, -tahr.) va uning jinoiy buyruqlarining barcha ijrochilarini Nyurnberg tribunali kutishi haqida gapiryapmiz. Biz bu maʼlumotlarni nafaqat Ukraina yoki Yevropa mamlakatlarida, balki O‘zbekistonda ham bilishlarini xohlaymiz. Biroq, taassufki, Rossiya telekanallari umuman boshqa urushni yoki ehtimol, bu urushning aslida yo‘qligini namoyish etmoqda. Shuning uchun ham biz notani tayyorlashga majbur bo‘ldik, men uni imzoladim, biz 1-martdayoq uni yuborgandik”, – deydi Mikola Doroshenko.

Elchi, shuningdek, notaning qisqacha mazmuni haqida maʼlum qildi.

Unga ko‘ra, notada Rossiya OAVsi tomonidan olib borilayotgan axborot kampaniyasi xarbiy kampaniyaning bir qismi ekani, shuningdek, u dunyo jamoatchiligini yolg‘on maʼlumotlar bilan aldashga qaratilgani aytiladi. Elchining taʼkidlashicha, shu sabab ham bugungi kunda ko‘plab mamlakatlarda Rossiyaning propaganda telekanallari translyatsiyasi taqiqlab qo‘yilgan.

Shuningdek, Rossiya OAVlari “Rossiya Federatsiyasining Ukrainaga qarshi urushini targ‘ib qilish, allaqachon minglab begunoh fuqarolar jabrlangan va fuqarolik infratuzilmasiga ulkan miqyosda zarar yetkazgan keng ko‘lamli Rossiya qurolli tajovuziga qarshi kurashayotgan ukrain xalqiga nisbatan milliy nafratni qo‘zg‘ashga qaratilgan maqsadli faoliyatni amalga oshirmoqda”.

 “Yuqoridagilardan kelib chiqib, Ukraina tomoni O‘zbekiston hukumati va vakolatli idoralardan Rossiya telekanallari translyatsiyasini va ijtimoiy tarmoqlardagi maʼlumotlarini taqiqlash haqida qaror qabul qilishni so‘radi”, – deydi Mikola Doroshenko. 

Elchi Mikola Doroshenko “Ozodlik” radiosiga bergan intervyusida, shuningdek, Ukrainaga 28 tonnalik gumanitar yordamni yuborgani uchun O‘zbekistonga minnatdorchilik bildirdi.

• Elchixona
• Nota
• O‘zbekiston
• TIV
• Ukraina