21-aprel kuni Toshkent shahri 45 davlatdan 5 mingga yaqin havaskor yuguruvchi va professional sportchilarni VI BYD Toshkent xalqaro marafonida qabul qildi.

Marafon tashkilotchilari sifatida Toshkent shahar hokimligi, O‘zbekiston Respublikasi Sport vazirligi, Oliy ta’lim, fan va innovatsiyalar vazirligi, “O‘zbekneftgaz” AJ, Milliy olimpiya qo‘mitasi, O‘zbekiston Mudofaa vazirligi, Ichki ishlar vazirligi, Yoshlar ishlari agentligi, Kasaba uyushmalari federatsiyasi, Favqulodda vaziyatlar vazirligi, hamda O‘zbekiston Yengil atletika federatsiyasi ishtirok etdi.

O‘zbekiston Respublikasi yengil atletika Federatsiyasi Markaziy Osiyo yengil atletika assotsiatsiyasi bilan birgalikda sport tadbirining koordinatori sifatida oltinchi marotaba ishtirok etdi.

VI BYD Toshkent xalqaro marafoni dasturiga 4 ta masofa: 3 va 10 km ommaviy yugurish musobaqasi, yarim marafon va marafon masofasi kiritilgan.

Marafonning umumiy mukofot jamg‘armasi 720 mln so‘mni tashkil etdi. Bunda: marafon ishtirokchilari 1-o‘rin uchun — 60 mln so‘m, 2-o‘rin uchun — 40 mln so‘m, 3-o‘rin uchun — 30 mln so‘m, 4-o‘rin uchun — 20 mln so‘m, 5-o‘rin uchun — 16 mln so‘m, 6-o‘rin uchun — 10 mln so‘m pul mukofoti bilan taqdirlandi.

Yarim marafon ishtirokchilari: 1-o‘rin uchun — 35 mln so‘m, 2-o‘rin uchun — 25 mln so‘m, 3-o‘rin uchun — 20 mln so‘m, 4-o‘rin uchun — 16 mln so‘m, 5-o‘rin uchun — 12 mln so‘m, 6-o‘rin uchun — 8 mln so‘m pul mukofoti bilan taqdirlandi.

10 km masofaga yugurish ishtirokchilari: 1-o‘rin uchun — 9 mln so‘m, 2-o‘rin uchun — 6 mln so‘m, 3-o‘rin uchun — 3 mln so‘m pul mukofoti bilan va 3 km masofaga yugurish musobaqasi g‘olib va sovrindorlari qimmatbaho sovg‘alar bilan taqdirlandi.

Yarim marafonda eng yaxshi natija ko‘rsatgan Parij Olimpiya o‘yinlari lisenziati Shohruh Davlatov va marafonda eng yaxshi natija qayd etgan mahoratli sportchi Yekaterina Tunguskovalar BYD avtomashinalarini qo‘lga kiritdi.