Bu haqda NBC News telekanaliga Eron oliy rahbarining bosh maslahatchisi Ali Shamxoniy bayonot berdi.

Uning so‘zlariga ko‘ra, Eron sanksiyalarning bekor qilinishi evaziga yadro quroli ishlab chiqarmaslik majburiyatini oladi, yuqori darajada boyitilgan uran zaxiralaridan voz kechadi, uranni faqat fuqarolik maqsadlar uchun zarur bo‘lgan past darajalargacha boyitishga rozi bo‘ladi va bu jarayonni xalqaro inspektorlar nazorat qilishiga ruxsat beradi.

“Shu bilan birga, Tramp Erondan hatto fuqarolik ehtiyojlari uchun ham uran boyitmaslikni va yadroviy yoqilg‘ini import qilishni talab qilmoqda. Biroq Tehron bu borada murosa qilishni istamayapti”, – deya yozmoqda NBC News.

Eron tashqi ishlar vaziri Abbos Aroqchining so‘zlariga ko‘ra, uranni boyitish – Eron hech qachon voz kechmaydigan masala, bu yerda kelishuvga o‘rin yo‘q.

“Biroq uning miqyosi, darajasi yoki hajmi ishonchni mustahkamlash maqsadida ma’lum muddatga o‘zgarishi mumkin”, – deya qo‘shimcha qilgan vazir.

Avvalroq Tramp boshqa davlatlarga Eron neftini sotib olgani uchun ikkilamchi sanksiyalar joriy qilish bilan tahdid qilgan edi.

• AQSh
• Bitim
• Eron
• Sanksiya
• Yadroviy qurol