Kecha, 6-may kuni Senatning Axborot siyosati va davlat organlarida ochiqlikni taʼminlash masalalari qo‘mitasida “Davlat hokimiyati va boshqaruvi organlari faoliyatining ochiqligi to‘g‘risida”gi qonunning Xalq taʼlimi vazirligi tomonidan ijro etilishini o‘rganish yakunlari bo‘yicha majlis bo‘lib o‘tdi.

Yig‘ilishda ochiqlikni taʼminlash yo‘nalishida vazirlik tomonidan bir qancha ishlar amalga oshirilgani taʼkidlandi.

Shu bilan birga majlisda vazirlik, uning tarkibiy va hududiy boshqarmalari tomonidan ochiqlikni taʼminlash yo‘nalishida yo‘l qo‘yilgan kamchiliklar tanqid qilindi.

Xususan, vazirlik 2021-yildagi faoliyatiga oid hisobotini joriy yil 1-aprelga qadar jamoatchilik ishtirokida muhokama qilish uchun matbuot anjumanini o‘tkazmagan, vazirlik faoliyati to‘g‘risida axborot olishga doir so‘rovlarni ko‘rib chiqishning umumiy natijalari haqidagi axborot eʼlon qilinmagan, vazirlik faoliyatiga oid axborotlar axborot-kutubxona va arxiv fondlariga taqdim etilmagan, vazirlikning “uzedu.uz” rasmiy veb-saytini yuritish ishlari o‘z xoliga tashlab qo‘yilgan.

Vazirlikning rasmiy veb-sayti hamda ochiq maʼlumotlar portali (data.egov.uz)da ham ochiq maʼlumotlar eʼlon qilinmagan.

Jumladan, amalga oshirilgan davlat xaridlari, davlat byudjeti, davlat maqsadli jamg‘armalari hamda byudjetdan tashqari jamg‘armalari hisobiga xarid qilinishi rejalashtirilgan tovarlar (ishlar, xizmatlar) to‘g‘risidagi (xarid eʼlon qilinishidan kamida 6 oy oldin);

– davlat xaridlari va investitsiya loyihalari doirasida tashkil etiladigan xarid komissiyalarining xarid komissiyasi tarkibini tasdiqlash haqidagi qarori;

– tasdiqlangan yillik xarajatlar smetasi bilan bir qatorda, uning ijrosi, shu jumladan obyektlarni qurish, rekonstruksiya qilish va kapital taʼmirlash ishlari, avtomototransport vositalarini sotib olish va saqlash xarajatlari;

 – xizmat uylari va boshqa ko‘chmas mulklar;

 – vazirlikning tasdiqlangan yarim yillik va (yoki) yillik ish rejalari;

 – vazirlikka doimiy foydalanish uchun berilgan yer maydonlari va boshqa mol-mulklarni davlat-xususiy sheriklik asosida olgan yuridik va jismoniy shaxslar kabi maʼlumotlar ochiq maʼlumotlar eʼlon qilinmagan.

Qo‘mita aʼzolari Xalq taʼlimi vazirligi tomonidan ijtimoiy ahamiyatga molik maʼlumotlarni o‘z muddatida eʼlon qilib borishi, faoliyat ochiqligini taʼminlashdagi kamchiliklarni bartaraf etishi lozimligi qayd etildi.

Majlis yakunida Qo‘mitaning tegishli qarori qabul qilindi.

• Qo‘mita
• Senat
• XTV