Kelishuv doirasida XAMAS garovga olingan to‘rt nafar isroillikning jasadlarini Qizil Xochga topshirdi. Ushbu bitim Isroil va XAMAS harakati Isroil tomoniga garovga olingan yana to‘rt kishining jasadini topshirish va shu vaqtning o‘zida 602 nafar falastinlik mahbusni ozod qilish haqida edi. Kelishuv ijrosi haqda “Associated Press” xabar bermoqda.

Ma’lum qilinishicha, tobutlar “Kerem-Shalom” nazorat-o‘tkazish punkti orqali Isroil mudofaa armiyasiga topshiriladi. Isroil ularni chegaraga yaqin hududda aniqlash jarayonidan o‘tkazib, kelishuvda qayd etilgan garovga olingan shaxslarning aynan o‘zi ekaniga ishonch hosil qilmoqchi.

“The Times of Israel” nashriga ko‘ra, Isroil tomoniga 69 yoshli Nir-Oz kibutsida yashagan Isik Elgarat, 49 yoshli Saxi Idan, 85 yoshli Shlomo Mansur va yana bir sobiq garovga olinganning jasadlari topshirilishi kerak. Nashrda yozilishicha, Mansur XAMAS tomonidan garovga olingan isroilliklarning eng yoshi kattasi bo‘lgan. Taxminlarga ko‘ra, u 2023-yil 7-oktyabr kuni hujum paytida o‘ldirilgan. Shundan so‘ng, uning jasadi G‘azo sektoriga olib ketilgan.

AFP agentligi ma’lumotlariga ko‘ra, Isroil qamoqxonalaridan ozod qilinishi kelishuvning bir qismi bo‘lgan falastinlik mahbuslarni olib ketayotgan avtobus Ramalloh shahriga yetib borgan. U yerda ularni ko‘plab falastinliklar kutib olgani qayd etilmoqda.

• Bitim
• Falastin
• Isroil