Kecha, 11-aprel kuni Belgiya poytaxti Bryusselda bo‘lib o‘tgan Ukraina mudofaasi bo‘yicha kontakt guruhi (Ramshteyn formati, Ukraine Defense Contact Group, UDCG) yig‘ilishida Ukraina mudofaasini kuchaytirish uchun jami 21 milliard yevrodan ortiq mablag‘ ajratilishi e’lon qilindi. Bu haqda BBC xabar berdi.

Ma’lum qilinishicha, bu summaning yarmidan ko‘pi – taxminan 11 mlrd yevro Germaniya hissasiga to‘g‘ri keladi. Buyuk Britaniya esa taxminan 5,2 mlrd yevro ajratishni rejalashtirmoqda. Germaniya Mudofaa vaziri Boris Pistoriusning so‘zlariga ko‘ra, yaqin kunlarda Berlin Kiyevga quyidagilarni yetkazib beradi:

– 100 ming dona artilleriya snaryadi;

– 25 ta piyoda jangovar mashinasi;

– 15 ta asosiy jangovar tank;

– 100 ta yerusti kuzatuv radar stansiyasi;

– 120 ta ko‘chma zenit-raketa majmuasi.

Shuningdek, Germaniya Ukrainaga IRIS-T zenit-raketa mudofaa tizimining to‘rtta majmuasini va ularga 300 ta raketa bilan topshiradi.

Bundan tashqari, Britaniya-Norvegiya tomonidan ajratilgan 523 mln yevro miqdoridagi qo‘shma paket radarlar, tankka qarshi minalar, harbiy texnika ta’miri, shuningdek yuz minglab dronlarning xaridini moliyalashtiradi.

“Ukrainaga kuchli armiya zarur, faqat shundagina muzokaralar adolatli va barqaror tinchlikka olib kelishi mumkin. Rossiya Ukraina kurashni davom ettirishga qodirligini tushunishi kerak va biz bu borada uni qo‘llab-quvvatlaymiz”, – deydi Germaniya Mudofaa vaziri.

• Moddiy yordam
• NATO
• Ukraina