Yangi yil kelishi bilan ekranlarimizda biz sevib tomosha qiladigan, yangi yil shukuhini beradigan kino va multfilmlar boshlanadi. Bolalik xotiralari, qish zavqi, ezgulik g'alabasiga yo'g'rilgan kino-filmlarni birgalikda tomosha qilamiz.

“Uyda yolg‘iz”

1990-yili katta ekranlarga chiqqan film o‘ttiz yildan oshibdiki, muxlislarini yo‘qotgani yo‘q. Kris Kolumbus rejissyorligida suratga olingan kartinada Mak Kalkin bosh rolni ijro etgan. Uning ikkinchi qismi ham dovrug‘ qozongan. Sakkiz yashar bolaning ikki o‘g‘rini chuv tushirish yo‘llari yumorga boy bo‘lib, asar zamirida oila muqaddasligi g‘oyasi ilgari surilgan.

Donald Tramp “Uyda yolg‘iz” filmi yutug‘iga o‘zini sababchi qilib ko‘satmoqda

AQShning sobiq rahbari va kelasi yil prezidentlikka nomzod Donald Tramp “Uyda yolg‘iz 2” filmida rol ijro etganini bilarmidingiz. Donal Tramp o‘z ijtimoiy tarmog‘ida 20 yil avval uni “Uyda yolg‘iz 2” filmiga taklif qilishganini eslab post qo‘ydi. Uning so‘zlariga ko‘ra u rolni ishlari ko‘p bo‘lgani bois dastlab rad etgan. Biroq keyin rozi bo‘lgan.

Aslida ushbu film rejissyori Kris Kolumbning aytishicha Tramp filmda rol ijro etishi evazigagina mehmonxonasida suratga olishga ruxsat berishini aytgan.
Tramp ishtirok etgan kadr bir necha soniyalarni tashkil qiladi. Bolakay Kevin Makkallister undan qabulxonaga yo‘nalishni so‘raydi va u yo‘nalishni ko‘rsatib yuboradi. Trampning filmda ishtiroki kino muvafaqqiyatga sababchi bo’lganini qayd etib o’tgan.

“Qor malikasi”

Qor malikasi - qishning eng ommabop va qiziqarli multfilmi. Ushbu multfilm Xans Kristian Andersenning mashhur ertagi asosida ishlangan. Rus rejissyori Lev Atamanov 1957-yili yaratgan kartinada yaxshilik va yomonlik kurashi tavsirlanadi. Gerdaning Qor malikasi o‘g‘irlab ketgan ukasi Kayni qutqarish yo‘lidagi sarguzashtlari bayon etiladi. Yuragi muzlab qolgan bolakayni mehr ko‘z yoshlari bilan o‘ziga qaytargan qizaloq alal oqibat Qor malikasini yengadi. Voqealar, tabiiyki, qish faslida, qahratonda yuz beradi. Bug‘u, qaroqchi qiz obrazlari ham muxlislarda yorqin taassurot qoldiradi. Oila davrasida yosh-u qarini birdek ko'rishga chorlovchi sevimli multfilmlarimizdan biri.

“Taqdir hazili yoki qushdek yengil bo‘ling!”

Rejissyor Eldar Ryazanov ishlagan film ilk tomoshadayoq 100 million muxlis yiqqan. Bosh rollarni Andrey Myagkov va Barbara Brilska ijro etgan. Muxlislar talabi bilan 2007-yili kartinaning mantiqiy davomi ham ishlandi, unda keksaygan qahramonlarimizning farzandlari ichakuzdi sarguzashtlarni boshdan kechirishadi. “Taqdir hazili...”dagi diltortar qo‘shiqlarni Sergey Nikitin va Alla Pugachyova kuylagan.

“Qarsildoq”

Gofman ertaklari va mashhur bastakor Chaykovskiy baleti asosida Soyuzmultfilm studiyasida Boris Stepansev tomonidan yaratilgan (1973). Asarda qo‘g‘irchoq qarsildoq va qizaloqning do‘stligi tavsirlanadi. Kalamushlar hujumiga qarshi kurashda ezgulik g‘olib chiqadi. Multfilm Ispaniyada “Bolalar va o‘smirlar filmlari” tanlovida birinchi o‘rinni olgan.

“Sohibjamol va maxluq”

Uolt Disneyning ushbu animasion filmi fransuz ertaklari asosida ishlangan. 1991- yili musiqali melodrama janrida suratga olingan asar yilning mashhur uchligida “Terminator 2” va “Robin Gud”dan keyingi pog‘onani zabt etgan. 1997-yili yaratilgan ikkinchi qismida Yangi yilni nishonlash mavzusi tasvirlanadi. Samimiy go‘zal qiz Bellning maxluq qiyofasidagi shahzodaga ko‘ngil qo‘yishi orqali surat emas, siyrat muhimligi ta’kidlanadi.

«Ы» operatsiyasi yoki Shurikning boshqa sarguzashtlari

Leonid Gayday 1965-yili ishlagan kartina o‘sha yiliyoq 69 million muxlis olqishiga sazovor bo‘lgan. Mana, ellik yildirki, yuz millionlab insonlar uchun hamon suyumli. Yangi yil arafasida yuz bergan voqealar, soxta o‘g‘irlikka tushgan uch qahramonga Shurik to‘sqinlik qilishi... film syujetini aytmasak ham, o‘zingiz bilasiz.

• Bayram
• Kino
• Multfilm
• Yangi yil