Ayni paytda Oliy Majlisi Qonunchilik palatasining navbatdagi majlisi boshlandi.

Oliy Majlis Qonunchilik palatasining navbatdagi majlisida deputatlar O‘zbekiston Respublikasi Davlat byudjetining va davlat maqsadli jamg‘armalari byudjetlarining 2021-yildagi hamda 2022-yilning birinchi choragidagi ijrosi to‘g‘risidagi hisobotni ko‘rib chiqmoqdalar.

Kun tartibidagi masala yuzasidan moliya vaziri Timur Ishmetov axborot taqdim etyapti.

Vazirning maʼlum qilishicha, hisobot davrida O‘zbekiston iqtisodiyotida yuqori o‘sish surʼatlariga erishishda  sanoat, xizmatlar va qurilish sohalari iqtisodiy o‘sish drayverlari bo‘lib xizmat qildi. Xususan, iqtisodiy o‘sish sanoatda 9,2 foiz, xizmatlar sohasida 8,7 foiz, qurilishda 6,8 foiz hamda qishloq, o‘rmon va baliq xo‘jaligida 4,0 foizga taʼminlandi.

2021-yil yakunlari ijrosida Davlat byudjetining xarajatlari (davlat maqsadli jamg‘armalarisiz) esa 188,3 trln. so‘mni yoki yalpi ichki mahsulotga nisbatan 25,6 foizni tashkil etdi. Ijtimoiy xarajatlarni moliyalashtirish uchun Davlat byudjetidan 92,0 trln. so‘m yoki umumiy xarajatlarning 48,9 foizi miqdorida mablag‘ sarflandi. Ushbu xarajatlarning 87,7 foizi ijtimoiy soha va aholini ijtimoiy qo‘llab-quvvatlash xarajatlari hissasiga to‘g‘ri keladi.

Qayd etilishicha, Moliya vazirligining Davlat moliyaviy nazorati departamenti tomonidan 2022-yil 1-choragida o‘tkazilgan 1 687 ta moliyaviy nazorat tadbirlaridan 1 283 tasida 261,7 mlrd. so‘m miqdoridagi moliyaviy xatoliklar, jumladan 39,2 mlrd. so‘m miqdorida kamomad va o‘zlashtirishlar, 199,8 mlrd.so‘mi byudjet mablag‘laridan asossiz va ortiqcha to‘lovlar hamda 22,7 mlrd. so‘mi maqsadsiz xarajatlar huquqbuzarliklarning boshqa turlari aniqlangan.

• Hisobot
• Moliya
• Qonunchilik palatasi