Zargarlik buyumini sotib olishdan avval uning sifatiga ishonch komil qilish zarur. Firibgarlarning qaramog‘iga osongina tushib qolmaslik uchun toza tillani soxtasidan ajrata olishni bilishingiz kerak.

Tekshirishning turli usullari

Tillaning soxta yoki haqiqiy ekanligini quyidagi oddiy usullar yordamida aniqlab olish mumkin.

• Yod

Tilla buyumni yod bilan qayta ishlash uning sifatini tekshirishning eng ishonchli usuli. Yodning bir tomchisi tilla buyumga tomiziladi va uch daqiqa kutiladi, so‘ng artib tashlanadi. Artish vatqida yod tomizilgan yer o‘z rangini o‘zgartirmagan bo‘lsa, demak, buyum toza tilladan yasalgan. 

• Sirka

Agar yoddan foydalanishning imkoni bo‘lmasa, sirkadan foydalanishingiz mumkin. Toza idishga sirka quyiladi va unga tilla buyum solinadi. Oradan yarim soat o‘tgach, buyum olib tekshiriladi: agar rangi o‘zgargan bo‘lsa, demak, qo‘lingizdagi tilla soxta.

• Tilla xlori

Bu suyuqlik tilla buyum yuziga surtib ko‘riladi. Haqiqiy tilla buyum bu suyuqlik bilan reaksiyaga kirishmaydi, buyumda o‘zgarishlar paydo bo‘lmaydi. Soxtasi esa, albatta, o‘z rangini va ko‘rinishini o‘zgartirib oladi.

• Magnit
Agar tilla oddiy metall ustiga yurgizilgan bo‘lsa, buni magniy bo‘lagi orqali aniqlab olish mumkin. 

• Keramik plitka
Tilla buyum plitka yuzasiga ishqalanadi va undan qolgan izga baho beriladi. Agar ishqalangan yerda kulrang yoki qoramtir iz qolsa, bu oddiy metall. Haqiqiy tilla o‘zidan faqatgina tillarang iz qoldiradi.

Yuqoridagi usullar tilla buyum ko‘rinishiga sezilarli ta’sir ko‘ratishi mumkin. Shuning uchun ularni qo‘llashda ehtiyotkor bo‘ling...

Xalqona usullardan foydalanib ko‘ramiz
Tilla sifatini aniqlashda quyida keltiriladigan usullardan ham foydalanishingiz mumkin.

• Yaltiroqliligini aniqlash

Haqiqiy tilla quyosh nurida ham soya joyda ham birdek yarqiraydi. Farqni aniq bilish uchun tilla buyumni avval soya joyda, keyin quyosh nuri ostida tekshirib ko‘rish kerak.

• Qora non
Nonning yumshoq qismi ajratib olinib idishga solinadi. Unga biroz suv quyib, bo‘tqa hosil bo‘lguncha aralashtiriladi. So‘ng aralashmaga tilla buyum solib qo‘yilib, aralashma qotgunicha kutiladi. 

Non qotgach, tilla buyumni olib, uning izi ko‘zdan kechiriladi. Tilla buyum haqiqiy bo‘lsa, undan hech qanday iz qolmaydi. Aksi bo‘lsa, buyum o‘rnida oksidlanish izlari paydo bo‘ladi.