G‘azo bo‘yicha Tinchlik kengashining oliy vakili, Bolgariyaning sobiq tashqi ishlar vaziri va BMTning Yaqin Sharq tinchlik jarayoni bo‘yicha sobiq maxsus vakili Nikolay Mladenov Donald Trampning G‘azo bo‘yicha “Keng qamrovli tinchlik rejasi”ni amalga oshirishga qaratilgan 15 banddan iborat “Yo‘l xaritasi”ni e’lon qildi. Hujjat BMT Xavfsizlik kengashidagi brifingdan so‘ng uning X sahifasida chop etildi.

Hujjatning 1–5-bandlari mojaroni tinch yo‘l bilan hal qilishning asosiy tamoyillariga bag‘ishlangan. 6–11-bandlar xavfsizlik masalalarini qamrab olgan bo‘lsa, 12–14-bandlar Isroil mudofaa armiyasi – SAHALning G‘azodan bosqichma-bosqich chiqishi va xalqaro barqarorlashtiruvchi kuchlarga oid. 15-band esa G‘azoni tiklash ishlariga bag‘ishlangan.

Rejaga ko‘ra, G‘azo urush va gumanitar inqirozdan tiklanish, qayta qurish va falastinliklar o‘zini o‘zi boshqarishi bosqichiga o‘tishi, keyinchalik esa mustaqil Falastin davlati tashkil etilishi nazarda tutilgan.

Hujjatda amaldagi o‘t ochishni to‘xtatish kelishuvlari doirasida gumanitar yordam, yoqilg‘i yetkazib berish, chegara o‘tish punktlari faoliyati va turar joy masalalari bo‘yicha majburiyatlar to‘liq bajarilishi shartligi ta’kidlangan. Shuningdek, hujjatda qurolli tuzilmalarni boshqaruv tizimidan ajratish ko‘zda tutilgan. Biroq davlat xizmatchilari va munitsipal xodimlarga nisbatan jamoaviy jazo qo‘llanmasligi qayd etilgan.

• G‘azo
• Tinchlik shartnomasi
• Tramp