Oliy ta’lim muassasalarida korrupsiyaga qarshi kurashish ishlarini tashkil etishga mas’ul trenerlar tayyorlandi. Ushbu loyiha Oliy va o‘rta maxsus ta’lim vazirligi huzuridagi Bosh ilmiy-metodik markaz hamda O‘zbekiston Respublikasi Bosh prokuraturasi Akademiyasi hamkorligida amalga oshirildi.

Oliy va o‘rta maxsus ta’lim vazirligi tomonidan mazkur loyiha doirasida tizimda korrupsiyaning har qanday ko‘rinishi bartaraf etishga qaratilgan tizimli ishlar olib borilmoqda. 

Navbatdagi tashabbus –Bosh ilmiy-metodik markaz hamda Bosh prokuraturas Akademiyasi hamkorligida Oliy ta’lim muassasalari boshqaruv xodimlari va professor-o‘qituvchilari uchun kasbiy odob-axloq qoidalariga rioya etish, manfaatlar to‘qnashuvini bartaraf qilish va korrupsiyaga qarshi kurashishning boshqa yo‘nalishlari bo‘yicha qisqa muddatli trenerlar tayyorlash kurslari tashkil etildi.

Joriy yilning 17–21-dekabr kunlari bo‘lib o‘tgan ushbu kurslarda 90 ta oliy ta’lim muassasacidan jami 121 nafar trenerlar tayyorlandi.

Trenerlarga malakali mutaxassislar tomonidan oliy ta’lim tizimida korrupsiyaga qarshi kurashishni takomillashtirish va “Korrupsiyasiz soha” loyihasini amalga oshirish bo‘yicha “Yo‘l xaritasi”ning mazmun –mohiyati, oliy ta’lim sohasida korrupsiya xavf-xatarlarini aniqlash va baholash masalalariga bag‘ishlangan ma’ruzalar tashkil etildi.

Kurs yakunida tinglovchilarga elektron shakldagi o‘quv-uslubiy materiallar to‘plami hamda sertifikatlar taqdim etildi.

Mazkur trenerlar joylarda oliy ta’lim muassasalari boshqaruv xodimlari va professor-o‘qituvchilari uchun davriy ravishda kasbiy odob-axloq qoidalariga rioya etish, manfaatlar to‘qnashuvini bartaraf qilish va korrupsiyaga qarshi kurashishning boshqa yo‘nalishlari bo‘yicha qisqa muddatli kurslar tashkil etib borishlari ko‘zda tutilgan.

Eslatib o‘tamiz, O‘zbekiston Respublikasi Prezidentining joriy yil 27-maydagi Farmoniga muvofiq, 2019-yil 1-avgustdan boshlab eksperiment tariqasida oliy ta’lim tizimida “Korrupsiyasiz soha” loyihasi amalga oshirilmoqda.

Elbek BOYMURADOV