Jahon bankining ijrochi direktorlar kengashi O‘zbekiston uchun 250 million dollarlik moliyalashtirish paketini ma’qulladi.

Ushbu mablag‘lar “shaharlarda yashash va mahsuldorlikni oshirish uchun qulay sharoitlar yaratish” (Livable and Productive Cities Program, LPCP) dasturi doirasida mamlakatning 16 ta tuman va shaharlarida aholi va biznes uchun shahar infratuzilmasi va xizmatlarini rivojlantirishga yo‘naltiriladi. O‘zbekistonning 37 million aholisining yarmidan ko‘pi shaharlarda istiqomat qiladi. 2050-yilga kelib bu ulush 60 foizdan oshishi kutilmoqda. Tez urbanizatsiya shaharsozlik va boshqaruv tizimini, infratuzilma va kommunal xizmatlarni, shu jumladan jamoat transporti va chiqindilarni boshqarish xizmatlarini takomillashtirishni talab qiladi.

Loyiha doirasida ijtimoiy va kommunal infratuzilma, transport, savdo va ishbilarmonlik muhiti, turizm obyektlari hamda jamoat joylariga sarmoya kiritiladi. Xususan, maktablar va bog‘chalar, tibbiyot muassasalari, suv ta’minoti va kanalizatsiya tizimlari, yo‘llar, piyodalar hududlari, bozorlar, bog‘lar hamda shaharlarni suv toshqinlaridan himoya qilish inshootlari yangilanishi rejalashtirilgan.

Jahon banki hisob-kitoblariga ko‘ra, 2030-yilga qadar mazkur dastur orqali 1 millionga yaqin aholining turmush sharoiti to‘g‘ridan-to‘g‘ri yaxshilanadi. Foyda ko‘ruvchilarning taxminan yarmini ayollar tashkil etadi. Shuningdek, 300 ming nafar aholi uchun transport xizmatlaridan foydalanish imkoniyatlari kengayadi, 400 ming kishi esa yangi yoki yangilangan jamoat joylari va bog‘lardan foydalanadi.

• Jahon banki
• Tashqi qarz