“Quloqsiz” sochlarni tartibga keltirib, ulardan chiroyli jingalak, ajoyib soch turmagini yasamoqchimisiz? Buni faqat mohir sartaroshgina amalga oshira oladi, deysizmi? Yanglishasiz, bu sizning ham qo‘lingizdan keladi… 

1.  Soch turmagini uzoqroq saqlanishi uchun

Sochlarni jingalak yoki oddiygina stayler (sochni jingalak qiluvchi moslama) bilan turmaklayotganingizda turmaklashni boshning o‘rtasidan boshlang. Shunda soch turmagi uzoqroq saqlanadi. 

2.   Agar sochlar hech jingalak bo‘lishni istamasa

“Qaysar” sochlarni ba’zida jingalak qilish qiyinchilik tug‘diradi. Bunday holatda folga qog‘ozi yordamga keladi. Soch avvaliga yumaloq shaklda o‘raladi. Uni yana folga qog‘oziga o‘rab, soch dazmoli yordamida ustidan bosib chiqiladi. Qarabsizki, chiroyli jingalaklar hosil bo’ladi.

3.  Soch turmagi tez buziladigan sochlar uchun

Agar sochingiz og‘ir bo‘lib, unda yuqoridan yig‘ilgan soch turmagining turishi qiyin bo‘lsa, quyidagi oddiy tavsiyaga e’tibor qiling. Soch turmagini yasashda oddiy soch to‘g‘nog‘ichlarini emas, spiral shakldagilaridan foydalaning. Shunda chiroyli soch turmagingiz buzilib ketmaydi.

4.  Choyli lakka ho‘llangan soch turmagi yaxshi saqlanadi

Soch turmagini qotirish uchun maxsus choyli lakdan foydalanib ko‘rganmisiz? Ularda ham soch turmagi uzoqroq saqlanadi, ham tabiiy mahsulotdan tayyorlangani sabab sochga ziyon keltirmaydi. 
2 choy qoshiq qora choy yoki bir paketchali choy bir stakan qaynagan suvga solib damlanadi. Soch turmagini yasashdan oldin sochlarni mazkur eritmaga solib namlab oling. Ana undan keyin ularni jingalak qiling.

5.  Yig‘ilgan sochni uzun va hajmdor ko‘rsatish uchun

Buning uchun soch yuqoridan pastga tomon ikkiga ajratiladi va ular soch dazmoli yoki stayler yordamida jingalak qilib olinadi. Shundan so‘ng ular ustma-ust ikkita alohida-alohida soch qisqichi bilan yig‘iladi. 
Oxirida sochlarni qo‘llaringiz bilan tarab-tarab qo‘ysangiz, hajmdor soch turmagi paydo bo‘ladi.

6.  Sochlarni oddiygina ko‘zoynaklar ham hajmdor qilib ko‘rsatishi mumkin

Yuvilgan sochlarni quritish vaqtida uni sochiq bilan ortga tomon tashlab quritishga harakat qiling. Sochlar biroz qurigach, boshga ko‘zoynak taqiladi. So‘ng ko‘zoynak biroz oldinga suriladi va shu bilan sochlar ildizidan biroz ko‘tariladi. Sochlar shu holatda yaxshilab qurigach, ko‘zoynakni olib tashlashingiz mumkin. Sochlaringiz hajmdor, yuz atrofidagilarida esa chiroyli tabiiy to‘lqinlar paydo bo‘ladi.

7.    Yig‘ilgan sochlar orasi ochilib qolmasligi uchun

Ba’zida “dumcha” shaklida yig‘ilgan sochlar orasi ochilib qoladi. Siyrak sochlarni ko‘rsatmaslik uchun, yig‘ilgandan so‘ng soch ildizlarini soch rangiga mos qovoqlar uchun mo‘ljallangan ten bilan bo‘yab chiqing. 

8.  Tabiiy jingalaklarni yaratishning oson usuli

Sochlar bir nechta bo‘laklarga bo‘linib, bir xil kattalikda o‘riladi. Ularning har birining ustidan soch dazmoli bosib chiqiladi. Soch o‘rimi qancha qalin bo‘lsa, jingalaklar shuncha katta bo‘ladi. Agar kechasi o‘rilgan sochlar bilan yotilsa, tabiiy jingalaklar o‘zidan-o‘zi hosil bo‘ladi. 

9.  “Quloqsiz” sochlar uchun yana bir tavsiya

Agar sochlaringiz qattiq va xurpaygan bo‘lsa, ularni yuvilgandan so‘ng quritish vaqtida to‘zg‘itmaslikka harakat qiling. Yaxshisi, ularni sochiq bilan ehtiyotkorona o‘rab, yengil harakatlar bilan suvni shimishga harakat qiling.

10.   Oddiy soch to‘g‘nog‘ichlari – “nevidimka”lardan g‘aroyib aksessuar yaratish mumkin. Uchta “nevidimka” olinadi va ularni sochga uchburchak shaklida taqiladi. Biroq bunda to‘qnog‘ichning to‘lqinli tomoni orqada, tekis tomoni esa yuqori holatda taqilishi kerak bo‘ladi.