Eng avvalo, barcha tibbiyot xodimlarini kasb bayramlari bilan tabriklaymiz!

Butun dunyoda oktabr, noyabr oylarining turli kunlari tibbiyot xodimlariga bag‘ishlanadi. Masalan, tibbiyot xodimlari kuni Rassiyada oktabrning birinchi dushanbasida nishonlansa, O‘zbekistonda bu sharafli kasb egalarini noyabr oyining ikkinchi yakshanbasida tabriklashadi. 

Bu bayram qachondan beri nishonlanadi?

O‘zbekiston Respublikasining Birinchi Prezidenti Islom Karimov tashabbusi bilan 2006-yil (Homiylar va shifokorlar yili munosabati bilan) 12-sentabr kuni qabul qilingan O‘zbekiston Respublikasi “Tibbiyot xodimlari kunini belgilash to‘g‘risida”gi qonunga muvofiq, mamlakatimizda har yili noyabr oyining ikkinchi yakshanbasi shifokorlarning kasb bayrami kuni deb belgilangan.

Yurtimizda shifokorlar xizmatini qadrlagan holda ularga katta ehtirom qaratiladi. Kuni kecha Prezident Shavkat Mirziyoyev tibbiyot xodimlariga o‘z tabrigini yo‘lladi. Bayram munosabati bilan bir guruh tibbiyot xodimlari taqdirlandi. 

Sohaga oid qiziqarli faktlar

Kosaga o‘ralib olgan ilon nima uchun tibbiyot ramzi hisoblanadi?

Ko‘pchilik bunga sabab ilon zahrining shifobaxshligi deb biladi. Boshqa ma’lumotga ko‘ra, mazkur ramz Yunonistonning shifo xudosi Asklepiy sabab yuzaga kelgan. Afsonaga ko‘ra, Asklepiy o‘g‘li Glaukni tiriltirish uchun Midas podshohligiga boradi. Yo‘lda bir ilon uning tayog‘ini o‘rab oladi va uni o‘ldirdi. Ammo keyin yana bir ilon og‘zida o‘t bilan Asklepiyni yoniga kelib, tiriltiradi. Shundan so‘ng, Asklepiy ana shu ilon keltirgan o‘t bilan bemorlarni oyoqqa turg‘iza boshlaydi.
  
Ibn Sino

Butun dunyo tibbiyotining rivojlanishida Ibn Sinoning “Tib qonunlari” asari katta ahamiyatga ega. Jahonda Avitsenna nomi bilan mashhur bo‘lgan buxorolik Abu Ali ibn Sino X asrdayoq operatsiyalar o‘tkaza olgan.
 
Tibbiyoti o‘ta yuqori darajada rivojlangan davlatlarning shifokorlari Ibn Sino qo‘llanmalaridan foydalanib shu darajaga erishganlarini tan olganlar. 

Ibn Sino haqida to‘liqroq ma’lumot olmoqchi bo‘lsangiz, mana bu kinoni ko‘rishingiz mumkin.

“Tabib” kinosi va “Doktor Xaus” seriali shifokorlar hayoti haqida hikoya qiluvchi eng mashhur media mahsulotlari hisoblanadi. 

Nozima RAHMATOVA tayyorladi