O‘z qo‘l mehnati bilan ta’mirlashni afzal ko‘radiganlar ko‘pincha yoqimsiz muammoga duch kelishadi: devor qog‘ozida pufakchalar paydo bo‘ladi yoki ular shunchaki ko‘chishni boshlaydi. Buning oldini olish uchun oddiy, ammo juda muhim ayyorona usullarni bilish kerak. 

1.  Yelimni to‘g‘ri tanlash 

Har bir gulqog‘oz uchun maxsus mo‘ljallangan yelimlardan foydalanish kerak. Bozorda bong urib sotiladigan umumiy (universal) yelimlar faqat yupqa gulqog‘ozlarni yopishtirishga yaraydi, xolos. Gul qog‘ozning turiga qarab tanlanadigan yelimlar mustahkamlikni ta’minlaydi. Buning uchun yelimlarda yozilgan izohlarni yaxshilab o‘qish lozim. U yerda yelim qaysi gulqog‘oz uchun mo‘ljallangani yozib qo‘yiladi.

2.  Gulqog‘oz uchun devorlarni to‘g‘ri tayyorlash

Bu jarayonni ishning eng asosiy qismi deb atash mumkin, lekin afsuski ko‘pchilik uning muhim ekanligiga ahamiyat bermaydi. Gulqog‘oz yopishtirishni boshlashdan oldin eski gipsni butunlay olib tashlab, devorni tekislash kerak. Biroq ko‘pchilik bunga erinib eski gips ustidan yangi gipsni yupqa qatlam qilib surtib gulqog‘ozni yopishtiraverishadi. 

3.  Sabr

Gulqog‘oz yopishtirishdan avval “gruntovka” yoki “shpatlyovka”ni yaxshilab qurishini kutish kerak. Faqat shundan keyingina eng qiziq jarayonni boshlash mumkin bo‘ladi. Agar gulqog‘oz yaxshi qurimagan yuza ustiga yopishtirilsa, devorda shishlar paydo bo‘ladi va chiroyli fon ko‘cha boshlaydi.

 4.  To‘g‘ri quritish jarayoni

Yopishtirilgan gulqog‘oz tabiiy sharoitda quritilishi kerak. Ushbu jarayonni tezlashtirishga urinishning hojati yo‘q. ularni shunchaki yelvizakning o‘zi quritishiga qo‘yib berish kerak. Agar ventilyator yoki isitish pechlaridan foydalanilsa, qog‘ozning usti qurib orti nam bo‘lib qolaveradi. Natijada hamma qilgan mehnatingiz “bir tiyin” bo‘ladi.  

5.  Gulqog‘oz qadog‘ida ko‘rsatilgan qoidalarga amal qiling

Yangi chiqayotgan gulqog‘ozlar qadog‘ida undan foydalanish qoidalari yozilgan bo‘ladi. Buni keraksiz deb hisoblab, e’tiborsiz qoldirmaslik kerak. Har bir gulqog‘oz o‘ziga xos xususiyatlari bilan ajralib turadi. Masalan, ba’zi gulqog‘ozlarning o‘ziga yelim surtib devorga yopishtirish kerak bo‘lsa, boshqalarini devorga yelim surtib keyin quruq qog‘ozni yopishtirish kerak bo‘ladi. 

Xullas, uyingiz uzoq vaqt chiroyli bo‘lib turishini istasangiz, yuqoridagilarga amal qiling!