Poytaxt markazidagi Amir Temur hiyoboni shaharning eng go‘zal joylaridan biri hisoblanadi. Buyuk sarkarda Amir Temur haykali bu yerning ko‘rkiga ko‘rk qo‘shib turibdi. Buni qarangki, bugun ushbu haykal o‘rnatilganiga naqd 25 yil bo‘libdi. 1994-yil 31-avgust kuni mustaqillik arafasida taniqli Badiiy Akademiya akademigi, O‘zbekistonda xizmat ko‘rsatgan san’at arbobi Ilhom Jabborov bronzadan quyma tarzda yasalgan Amir Temur haykalini keng ommaga taqdim qilgan. 

Hukmdor jangovar kiyimda, go‘yoki g‘alabali yurishdan qaytmoqda, chap qo‘li bilan olovli otini jilovlamoqda, o‘ng qo‘li uni kutib olayotgan odamlar uzra ko‘tarilgan va mamlakatda tinchlik-osoyishtalik hukm surishini ma’lum qilmoqda. Hukmdorning viqorli salobati va yarim bukilgan qo‘li farovonlik va taraqqiyot ramzidir. Haykal o‘rnatilgan tagkursida esa buyuk Temurning “Kuch – adolatdadir” shiorining to‘rt tilda yozilganligini ko‘ramiz.

Markaziy maydonga Amir Temur haykali o‘rnatilishidan oldin boshqa ko‘pgina haykallar, byustlar o‘rnatilib, xiyobonga turli nomlar berilgan. Quyida ularni yilma-yil ko‘rib chiqishingiz mumkin bo‘ladi. 

1882-yil—Konstantin xiyoboni

1913-yil – Kaufman xiyoboni

1918-yil – Mariya Spiridonova nomidagi xiyobon

1918-yil – Inqilob xiyoboni

1991-yil – Markaziy xiyobon

1994-yil –Amir Temur xiyoboni 

Haykallar:

1889-yil — Kaufman qabri

1913-yil — O‘rta Osiyoni zabt etgan qo‘shinlar haykali

1918-yil — Inqilob kurashchilari haykali

1918-yil — «Ozod etilgan mehnat» monumenti 

1927-yil — «Oktyabr – jahon inqilobi mash'ali 1917 — 1927» gumbazli kolonna

1930-yil — Lenin va «Besh yillikka 4 yilda!» haykali

1930-yil — Sobiq haykalning granitli asosi

1935-yil — Yo‘lning qatnov qismi

1948-yil — Stalin haykali

1961-yil — Kommunizm dasturi sharafig‘a bag‘ishlangan yodgorlik

1968-yil — Karl Marks haykali

1994-yil — Amir Temur haykali