Reuters’ga ko‘ra, Suriya rasmiylari banknotlarni bosib chiqarishni BAA va Germaniyaga ko‘chirish imkoniyatlarini ma’lum vaqtdan beri o‘rganmoqda. Mamlakat milliy valyutasi o‘n yildan ko‘proq vaqt davomida Rossiyada bosib kelingan. Yevropa Ittifoqi fevral oyida Damashqqa qarshi sanksiyalarni yumshatganidan so‘ng rasmiylarning bu yo‘nalishdagi harakatlari kuchaygan.

Ma’lum qilinishicha, ikki nemis kompaniyasi allaqachon Suriya funtlarini chop etishga qiziqish bildirgan. Ular davlat tomonidan qo‘llab-quvvatlanadigan Bundesdruckerei va Giesecke+Devrient xususiy korxonalaridir.

Suriyaning yangi ma’muriyati, shuningdek, banknotlardan sobiq prezident Bashar Asad portretini olib tashlab, Suriya funtining dizaynini o‘zgartirishni rejalashtirmoqda.

Ma’lumot uchun, Rossiya 2012-yildan Suriya banknotlarini chop etishni boshlagan. Bundan oldin Suriya funtlarini bosib chiqarish Avstriya kompaniyasi tomonidan amalga oshirilardi. Shartnoma Yevropa Ittifoqining Suriyadagi fuqarolar urushi ortidan kiritgan sanksiyalari tufayli bekor qilingan.

• BAA
• Germaniya
• Suriya
• Valyuta