Ўтган йилда 9 та балиқчилик кластери солиқлардан озод этилиши натижасида 6,5 млрд сўм имтиёзга эга бўлди. Бу “Ўзбекбалиқсаноат” уюшмаси маълум қилди.

Қайд этилишича, 2021 йилда балиқчиликни ривожлантириш мақсадида 364 та балиқчилик лойиҳалари амалга оширилиб, 2 310 нафар янги иш ўринлари яратилган.

Ушбу лойиҳалар доирасида личинка ишлаб чиқариш қуввати 470 млн. дона бўлган 10 та инкубация корхоналари ишга туширилиб, 4,1 млрд. дона балиқ личинкалари ишлаб чиқарилган ва  балиқ чавоқларини етиштиришга ихтисослашган 873 гектар майдонда қуввати 52 млн. дона бўлган репродуктор ҳавзалар барпо этилган.

Шунингдек, қуввати 15 минг тонна бўлган юқори сифатли омухта ем ишлаб чиқарувчи 3 та корхона ҳамда қуввати 4000 тонна бўлган балиқни қайта ишловчи 8 та корхона ишга туширилиб, қуввати 4,5 минг тонна бўлган 110 гектар майдонда интенсив сув ҳавзалари барпо қилинган.

Хитой, Россия, Туркия, Қозоғистон, Ветнам, Эрон ва Тожикистон давлатларига 8,9 млн. доллар қийматдаги 2,2 минг тонна балиқ ва балиқ маҳсулотлари экспорт қилинган.

Юқоридаги ишларни ташкил этилиши ҳисобига 2021 йилда жами 400 минг тонна балиқ етиштирилган ҳамда 9 та балиқчилик кластери солиқлардан озод этилиши натижасида 6,5 млрд. сўм имтиёзга эга бўлган.

Маълумот учун, 2022 йилда ҳам балиқ етиштирувчиларнинг фойда, ер ва мол-мулк солиқлари 50 фоизга камайтирилди.

• Baliqchilik
• Солиқ