Вазирлар Маҳкамасининг қарорига кўра, Тошкент вилояти Бўстонлиқ тумани ҳудудидаги 577 гектар ер майдонида қиймати 5 млрд АҚШ долларини ташкил этадиган умуммавсумий курорт мажмуасини барпо этиш бўйича йирик сармоя лойиҳаси амалга оширилади. Бунда ушбу ер майдони ижара муддати тугагандан кейин янги муддатга узайтириш бўйича устувор ҳуқуқ билан “Sеа Breeze Uzbekistan” МЧЖга 25 йилга тўғридан-тўғри ижарага берилади.

Шунингдек, қарор матнида қуйидагилар белгиланганди:

инвестор лойиҳани амалга ошириш даврида ва лойиҳа ишга тушгандан кейин чиқинди ҳамда оқова сувларнинг Чорвоқ сув омбори ва Чирчиқ дарёсига ташланишига йўл қўймаслик, оқова сувларни Чирчиқ шаҳри оқова сувларни тозалаш иншоотига йўналтириш чораларини кўриш мажбуриятини олади;

Бунда ушбу талабга риоя этмаслик лойиҳани тўхтатишга ва ерга бўлган ижара ҳуқуқининг бекор қилинишига асос бўлади;

лойиҳа ҳудудида жойлашган жисмоний ва юридик шахсларга тегишли кўчмас мулк объектлари(қишлоқ хўжалиги ва ўрмон хўжалиги ер участкаларидан ташқари) “Sеа Breeze Uzbekistan” МЧЖ томонидан уларнинг мулкдорлари билан келишув асосида сотиб олинади;

Бош прокуратура, Экология ҳамда Қурилиш вазирликлари қурилишда белгиланган талаблар бажарилишини доимий назорат қилиб боради, жумладан, Чорвоқ сув омборига оқова сувларни ташлашга йўл қўймаслик бўйича қатъий назорат ўрнатади;

Жумладан, Бош прокурор ўринбосари С.И.Самадов лойиҳанинг шаҳарсозлик ва экологик талаблар асосида амалга оширилишини таъминлаш юзасидан қатъий прокурор назоратини ўрнатади;

“Sea Breeze Uzbekistan” умуммавсумий курорт мажмуасини барпо этиш бўйича республика ишчи гуруҳи таркиби тасдиқланди. Республика ишчи гуруҳи инвестор томонидан инвестиция мажбуриятлари бажарилишини мониторинг қилиб боради.

• Chorvoq
• Дам
• Лойиҳа
• Сув