Ушбу янги авлод болалари глобал иқлим ўзгариши, жиддий ижтимоий муаммолар, аҳоли миграцияси ва тезкор урбанизация каби масалаларга дуч келадиган дунёни мерос қилиб олади. 2025-2039 йиллар оралиғида туғилган болалар Бета авлод вакиллари сифатида тан олинади. Бу ҳақда кеча, 29 декабрь куни “New York Post” нашри хабар берган.

Бета авлод 2010-2024 йиллар оралиғида туғилган Альфа авлод ортидан келади. Ундан олдин – 1997-2010 йилларда туғилган З авлод, 1981-1996 йилларда туғилган Й авлод ёки Миллениаллар мавжуд эди.

Демограф Марк Маккиндлнинг сўзларига кўра, 2035 йилга бориб, Бета авлод дунё аҳолисининг 16 фоизини ташкил қилади ва улар сунъий интеллект бошқарувида шаклланган янги дунёда яшашни бошлайди.

“Бета авлод кундалик ҳаётнинг барча жабҳаларида – таълим ва иш жойларидан тортиб, соғлиқни сақлаш ва кўнгилочар соҳаларгача сунъий интеллект ва автоматлаштириш тўлиқ интеграцияланган даврда яшайди”, – дейди Маккиндл.

Маълумот учун, авлодлар турли ижтимоий, маданий, иқтисодий ва технологик ўзгаришларга асосланиб таснифланади. Ушбу таснифлаш бир нечта соҳаларда фаолият олиб борувчи тадқиқотчилар, демографлар, социологлар ва маданиятшунослар томонидан амалга оширилади. Энг машҳур таснифлар Америка ва Европа ижтимоий тузилмаларига асосланган бўлса-да, глобал миқёсда ҳам қабул қилинган.