Иордания, БАА, Индонезия, Покистон, Туркия, Саудия Арабистони, Қатар ва Миср ташқи ишлар вазирлари қўшма баёнот билан чиқиб, Исроилни Ғазодаги тинчлик жараёнига тўсқинлик қилишда айблади.

Баёнотда Исроил Бош вазири Бинямин Нетаняхунинг АҚШ президенти Доналд Трампнинг Ғазо бўйича йўл харитасини рад этиши ҳамда Фаластин давлатчилигини инкор қилиши қораланган.

Саккиз давлат ТИВ раҳбарлари бундай позитсия Ғазодаги можарони ҳал қилишга қаратилган режани амалга оширишга жиддий хавф туғдириши ва барқарор тинчликка эришиш бўйича халқаро саъй-ҳаракатларга путур етказишини таъкидлаган.

Уларнинг қайд этишича, йўл харитаси Миср, Қатар, Туркия, АҚШ, Ғазо бўйича Олий вакил ва Тинчлик кенгаши иштирокидаги музокаралар ҳамда Фаластин фраксиялари томонидан қабул қилинган келишувлар натижасидир.

Режада Исроил қўшинларини Ғазодан олиб чиқиш, Халқаро барқарорлаштириш кучларини жойлаштириш, бошқарув ваколатларини Ғазони бошқариш бўйича Миллий қўмитага топшириш, ҳудудни қайта тиклаш ва қуролсизлантириш жараёнини амалга ошириш кўзда тутилган.

Баёнотда АҚШнинг ушбу жараёнда фаол иштирокини давом эттириши муҳим экани қайд этилиб, Исроил режа ва келишувларни амалга оширишга тўсқинлик қилиши оқибатлари учун жавобгар бўлиши таъкидланган.

Аввалроқ Бинямин Нетаняху ҲАМАС тўлиқ қуролсизлантирилмагунча Исроил қўшинлари Ғазодан олиб чиқилмаслигини билдирган эди.