Давлат хавфсизлик хизмати, Иқтисодий жиноятларга қарши курашиш департаменти ҳамда Ички ишлар органлари ходимлари ҳамкорлигида ўтказилган тезкор тадбирлар давомида фуқароларни хорижий давлатларга ишга юбориш ва виза расмийлаштириш ваъдаси билан пул маблағларини ўзлаштириш билан боғлиқ бир қатор фирибгарлик ҳолатлари фош этилди.

Тошкент шаҳрида яшовчи, 1985 йилда туғилган, муқаддам судланган шахс танишлари орқали Қашқадарё вилоятида истиқомат қилувчи 6 нафар фуқарони Словакия Республикасига ишга юборишни ваъда қилган. Бунинг эвазига 145 млн сўм талаб қилиб, олдиндан 85 млн сўм олган вақтида ашёвий далиллар билан ушланди.

Бошқа ҳолатда, Тошкент шаҳрида хорижий давлатларга виза олиш бўйича консалтинг хизматларини кўрсатувчи МЧЖ раҳбари 2002 йилда туғилган фуқаронинг ишончига кириб, виза расмийлаштириш ва уни Германияга ишга юбориш эвазига 4 минг АҚШ доллари олган вақтида ушланди.

Шунингдек, Тошкент вилоятининг Зангиота туманида яшовчи, 1993 йилда туғилган аёл 2000 йилда туғилган, Ангрен шаҳрида истиқомат қилувчи фуқаронинг ишончига кириб, виза расмийлаштириш ва уни Жанубий Кореяга ишга юборишни ваъда қилган. У ушбу хизмат эвазига 5 900 АҚШ доллари олган вақтида ушланди.

Мазкур ҳолатлар юзасидан қонунбузарларга нисбатан Ўзбекистон Республикаси Жиноят кодексининг 168-моддаси (фирибгарлик) билан жиноят ишлари қўзғатилган. Ҳозирда тергов ҳаракатлари олиб борилмоқда.

Фуқаролардан хорижга ишга юбориш ёки виза расмийлаштиришни ваъда қилаётган шахсларга пул маблағларини топширишдан аввал уларнинг фаолияти, ҳужжатлари ҳамда таклиф қилаётган хизматларининг қонунийлигини синчиклаб текшириш сўралади.