Олий таълим, фан ва инновациялар вазири Қўнғиротбой Шарипов UzReport каналига берган интервьюсида 2030 йилгача мамлакатдаги барча талабалар учун етарли талабалар турар жойлари барпо этилишини маълум қилди.

Вазирнинг таъкидлашича, давлат раҳбарининг тегишли қарорига мувофиқ, мамлакатда талабалар турар жойлари тармоғини кенгайтириш ишлари жадал давом эттирилмоқда. Давлат-хусусий шериклик асосида қурилаётган янги ётоқхоналар 2030 йилга бориб талабалар турар жойига бўлган эҳтиёжни тўлиқ қоплаш имконини беради.

Айни пайтда вилоятлардан келиб, кундузги таълим шаклида таҳсил олаётган талабаларнинг камида 20 фоизини ётоқхона билан таъминлаш имконияти мавжуд. Қолган талабалар эса ижара хонадонларида яшамоқда. Уларнинг ижара тўловининг ярми давлат томонидан қоплаб берилади. Шу сабабли талаба учун ётоқхонада яшаш ва ижара хонадонида туриш харажатлари деярли бир хил миқдорни ташкил этади.

Қўнғиротбой Шариповнинг қайд этишича, сўнгги 10 йил давомида мамлакатда 100 минг ўринли талабалар турар жойлари қурилиб, фойдаланишга топширилган. Таққослаш учун, ундан аввалги 100 йил давомида қурилган ётоқхоналардаги ўринлар сони жами 55 мингни ташкил этган.

Талабаларни ётоқхоналарга жойлаштириш жараёнини рақамлаштириш ва шаффофлигини таъминлаш мақсадида махсус электрон платформа ҳам ишга туширилган.

Ётоқхонага эҳтиёжи бўлган талабалар 15 августдан бошлаб мазкур тизим орқали рўйхатдан ўтишлари мумкин.

Жойлаштиришда, аввало, ижтимоий ҳимояга муҳтож ҳамда ногиронлиги бўлган талабаларга устуворлик берилади. Шундан сўнг ўринлар олис ҳудудлардан келган талабалар учун ажратилади. Навбат ҳудудларнинг пойтахтдан узоқлиги инобатга олинган ҳолда шакллантирилади.