Афғонистон Амударёнинг сув ресурсларидан фойдаланиш ҳуқуқига эга ва мамлакат қўшнилари билан сувдан фойдаланиш бўйича ҳеч қандай келишувга эга эмас. Бу ҳақда "Толибон" ҳукумати энергетика ва сув ресурслари вазири вазифасини бажарувчи Абдул Латиф Мансур маълум қилди.

“Ўз хавотирларини билдирганлар келишув асосида шундай қилишлари керак, аммо Афғонистонда сув ресурслари бўйича ҳеч қандай келишув йўқ. Ҳозирги вазиятда Амударё ҳавзаси бўйича келишувларимиз йўқ”, – деди у Қўштепа канали қурилиши билан боғлиқ хавотирларга изоҳ бераркан.

Вазирнинг сўзларига кўра, Афғонистоннинг амалдаги расмийлари қўшни давлатларнинг қўрқувини йўқотиш учун Амударё суви масаласини муҳокама қилишга тайёр.

Президент Шавкат Мирзиёев яқинда Душанбеда бўлиб ўтган Оролни қутқариш халқаро жамғармаси таъсисчилари давлат раҳбарлари кенгашининг йиғилишида сўзлаган нутқида Афғонистондаги Қўштепа канали Марказий Осиёдаги сув балансини тубдан ўзгартиришини таъкидлади. Унинг қурилиши туфайли минтақада сувдан фойдаланиш жараёнининг янги иштирокчиси пайдо бўлди, бу бошқа давлатлар олдидаги мажбуриятлар билан боғлиқ эмас, деди у.

Ўзбекистон Президенти каналнинг Амударёнинг сув режимига таъсирини ўрганиш бўйича қўшма ишчи гуруҳ тузиш, шунингдек, Афғонистонни сувдан биргаликда фойдаланиш бўйича минтақавий мулоқотга жалб этиш имкониятларини кўриб чиқишни таклиф қилди.

2022 йилда Афғонистон шимолида Амударёдан сув олиш учун Қўштепа суғориш канали қурилиши бошланди. Мутахассисларнинг фикрича, канал Ўзбекистон ва Туркманистонда сув танқислигини оширади.

• Афғонистон
• Amudaryo